باجوڑ میں مارٹر گولہ گرنے سے ایک کمسن بچہ ہلاک، 8 افراد زخمی

باجوڑ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع باجوڑ کی تحصیل سالارزئی کے علاقے کارڈوک میں مارٹر گولہ گرنے کے حادثے میں ایک کمسن بچہ ہلاک جبکہ آٹھ افراد زخمی ہو گئے۔

ریسکیو ذرائع کے مطابق دھماکے کے نتیجے میں متاثرہ افراد میں بچے اور خواتین شامل ہیں۔

سرکاری ذرائع نے بتایا کہ چند بچوں کو ایک مشتبہ مارٹر گولہ ملا، جسے وہ کھیلتے ہوئے گھر لے آئے۔ اچانک یہ گولہ زور دار دھماکے سے پھٹ گیا، جس کے باعث گھر میں موجود افراد زد میں آ گئے۔

تایم مقامی ذرائع کے مطابق کارڈوک کے قریب نامعلوم سمت سے مارٹر گولہ گرنے سے نو افراد زخمی ہوئے۔ بتایا گیا ہے کہ گزشتہ کئی ماہ سے سکیورٹی فورسز کے اہلکار علاقے میں موجود عسکریت پسندوں کے ٹھکانوں کو نشانہ بنا رہے ہیں، اور اکثر گولے عام آبادی کے قریب گرتے ہیں۔

حادثے میں ہلاک ہونے والے بچے کی شناخت انس ولد حضرت کے نام سے ہوئی ہے۔ زخمیوں میں واجد ولد عنایت، یامان ولد جہان، جواد ولد جہان، شاہد ولد عبد الواحد، ایک کمسن بچی دختر فضل واحد، ز (اہلیہ حضرت)، ف (اہلیہ جہان) اور ایک خاتون (اہلیہ عبد الواحد) شامل ہیں۔

تمام زخمیوں کو فوری طبی امداد کے لیے ہیڈکوارٹر ہسپتال خار منتقل کر دیا گیا، جہاں انہیں علاج فراہم کیا جا رہا ہے۔

انتظامیہ اور سیکیورٹی اداروں نے علاقے کو گھیرے میں لے کر شواہد اکٹھے کرنا شروع کر دیے ہیں۔