برطانیہ میں امریکی اڈے کے قریب تخریب کاری کا شبہ، ایران سے تعلق کی تحقیقات

لندن (ڈیلی اردو) برطانیہ میں انسداد دہشتگردی پولیس نے امریکی فضائیہ کے زیر استعمال رائل ایئر فورس فیئرفورڈ اڈے کے قریب مشتبہ سرگرمی کے معاملے کی تحقیقات شروع کردی ہیں، جبکہ واقعے میں پانچ افراد کو گرفتار کیا گیا ہے۔ برطانوی میڈیا کے مطابق تفتیش کار اس امکان کا بھی جائزہ لے رہے ہیں کہ مشتبہ منصوبے کا تعلق ایران سے ہوسکتا ہے، تاہم حکام نے تاحال کسی ایرانی مداخلت کی تصدیق نہیں کی۔

برطانوی پولیس کے مطابق اتوار کی رات تقریباً 12 بج کر 45 منٹ پر تین مشتبہ گاڑیوں کی اطلاع موصول ہوئی جو فیئرفورڈ فضائی اڈے کی جانب جاتی دکھائی دے رہی تھیں۔ مسلح پولیس اہلکاروں نے کارروائی کرتے ہوئے قریبی علاقے ویلفورڈ سے پانچ افراد کو گرفتار کیا، جنہیں پہلے دھماکا خیز مواد سے متعلق قوانین کی خلاف ورزی اور بعد ازاں دہشتگرد کارروائی کی تیاری کے شبہے میں حراست میں لیا گیا۔

تینوں گاڑیوں کی برطانوی فوج کے ماہرینِ دھماکا خیز مواد نے تلاشی اور جانچ شروع کی، جبکہ احتیاطی اقدام کے طور پر تقریباً 85 گھروں کے رہائشیوں کو علاقے سے منتقل کیا گیا اور گاڑیوں کے گرد تقریباً 400 میٹر کا حفاظتی حصار قائم کیا گیا۔ پولیس کا کہنا ہے کہ پانچوں افراد زیرِ حراست ہیں اور تحقیقات ابھی ابتدائی مرحلے میں ہیں۔

برطانوی اخبار ’’دی ٹیلیگراف‘‘ کے مطابق تفتیش کار مختلف امکانات کا جائزہ لے رہے ہیں، جن میں روس سے منسلک تخریب کاری، انتہا پسندانہ محرکات اور ایران سے ممکنہ تعلق شامل ہیں۔ اخبار کے ذرائع نے ایران سے تعلق کو موجودہ تحقیقات میں ایک اہم امکان قرار دیا ہے، تاہم یہ معلومات نامعلوم ذرائع سے منسوب ہیں اور برطانوی حکام نے اسے حتمی طور پر تسلیم نہیں کیا۔

فیئرفورڈ فضائی اڈہ خطے میں امریکی فوجی سرگرمیوں کے حوالے سے اہم سمجھا جاتا ہے اور حالیہ عرصے میں اسے ایران سے متعلق امریکی کارروائیوں کے لیے بھی استعمال کیا گیا ہے۔ اسی تناظر میں واقعے کے ممکنہ محرکات پر تفتیش کار مختلف پہلوؤں سے تحقیقات کر رہے ہیں، تاہم پولیس نے واضح کیا ہے کہ معاملہ ابھی زیرِ تفتیش ہے۔