بلوچستان: خضدار میں فائرنگ، ہندو تاجر سمیت تین افراد ہلاک، دو زخمی

کوئٹہ (ڈیلی اردو) پاکستان کے شورش زدہ صوبے بلوچستان کے ضلع خضدار میں نامعلوم مسلح افراد کی فائرنگ سے ایک ہندو تاجر سمیت تین افراد ہلاک جبکہ دو زخمی ہو گئے ہیں۔

پولیس کے مطابق یہ واقعہ خضدار کے علاقے نال میں پیش آیا، جہاں وڈھ سے تعلق رکھنے والے افراد پکنک کی غرض سے ہڑنبو ڈیم کے علاقے میں گئے تھے۔

پولیس کا کہنا ہے کہ نامعلوم مسلح افراد نے وہاں پہنچ کر ان افراد پر فائرنگ کر دی، جس کے نتیجے میں تین افراد ہلاک جبکہ دو زخمی ہو گئے۔

پولیس کے مطابق ہلاک ہونے والوں میں ایک ہندو تاجر بھی شامل ہے، جن کی شناخت ملّومل کے نام سے ہوئی ہے، جبکہ دیگر دو افراد عبدالرشید اور عبدالصبور تھے۔ زخمیوں کو فوری طور پر طبی امداد کے لیے مقامی ہسپتال منتقل کر دیا گیا ہے۔

پولیس کا کہنا ہے کہ حملے کے محرکات تاحال معلوم نہیں ہو سکے، تاہم جائے وقوعہ سے شواہد اکٹھے کر کے تحقیقات شروع کر دی گئی ہیں۔

دوسری جانب واقعے کے خلاف وڈھ میں لواحقین اور مقامی افراد نے احتجاج کرتے ہوئے کوئٹہ اور کراچی کو ملانے والی شاہراہ بند کر دی، جس کے باعث ٹریفک معطل ہو گئی۔