بلوچستان: خضدار میں موٹر سائیکل بم دھماکا، 3 افراد ہلاک، بچوں سمیت 10 زخمی

کوئٹہ (ڈیلی اردو) صوبہ بلوچستان کے ضلع خضدار میں عمر فاروق چوک قریب بم دھماکے میں 3 افراد ہلاک اور بچوں سمیت 10 زخمی ہوگئے۔

At least three people were killed, and 10, including policemen and women, were injured in a roadside explosion near Omar Farooq Chowk #Khuzdar Town of #Balochistan pic.twitter.com/fPhIp7YVc7

— ???????? (@Info_Balochistn) April 7, 2024

پولیس کے مطابق بم موٹر سائیکل میں نصب کیا گیا تھا، دھماکا مصروف مارکیٹ عمر فاروق چوک کے قریب ہوا۔

پولیس نے مزید بتایا کہ عمرفاروق چوک کےقریب ہونے والے بم دھماکے میں تین افراد ہلاک ہوئے ہیں۔ پولیس کی تحقیقات کے مطابق قریب کھڑی پولیس کی گاڑی ٹارگٹ تھی۔

پولیس کے مطابق بم دھماکے میں 10 افراد زخمی بھی ہوئے، دھماکے کے وقت لوگ عید کی خریداری میں مصروف تھے۔

ریسکیو ذرائع کے مطابق زخمیوں کو طبی امداد کی فراہمی کیلئء فوری طور پر ہسپتال منتقل کردیا گیا ہے۔

قانون نافذ کرنے والے اداروں نے جائے وقوع کو گھیرے میں لے کر تحقیقات کا آغاز کردیا ہے۔

وزیر اعلیٰ بلوچستان میر سرفراز بگٹی نے خضدار میں ہونے والے بم دھماکے کی مذمت کرتے ہوئے کہا ہے کہ معصوم افراد کو نشانہ بنانا غیر انسانی اور بزدلانہ فعل ہے، ایسے لوگوں کو معاف نہیں کیا جائے گا، انسانی جانوں سے کھیلنے والے دہشتگردوں کا ہر جگہ پیچھا کریں گے۔