بلوچستان: مچھ میں چیک پوسٹ پر حملہ، ایف سی اہلکار ہلاک، دو زخمی

کوئٹہ (ڈیلی اردو) صوبہ بلوچستان کے علاقے مچھ میں ایک سیکیورٹی چیک پوسٹ پر حملے میں ایف سی کا ایک سپاہی ہلاک اور 2 زخمی ہوگئے۔

پاکستانی فوج کے شعبہ تعلقات عامہ ‘آئی ایس پی آر’ کے مطابق دہشت گردوں نے مچھ میں قائم ایک سیکیورٹی چیک پوسٹ کو نشانہ بنایا تھا۔

پاکستانی فوج کے مطابق واقعے کے بعد سیکیورٹی اداروں نے بھرپور طریقے سے جواب دیا۔

اس حوالے سے جاری بیان میں کہا گیا کہ فائرنگ کے تبادلے میں ایک سپاہی عرفان ہلاک ہوگیا جبکہ دیگر دو زخمی ہوگئے۔

آئی ایس پی آر کے مطابق فوج نے دہشت گردوں کی بزدلانہ کارروائیوں کا بھرپور طریقے سے جواب دینے کے لیے پُر عزم ہے اور دہشت گردوں کو ملک کا امن و امان خراب کرنے کی اجازت نہیں دی جائے گی۔

دوسری جانب کالعدم بلوچ لبریشن آرمی نے حملے کی ذمہ داری قبول کرلی۔

واضح رہے کہ گزشتہ کچھ سالوں کے دوران صوبہ بلوچستان میں مختلف دہشت گرد تنظیموں کی جانب سے کارروائیوں میں اضافہ دیکھا گیا ہے جبکہ ان کی کارروائیوں کے جواب میں ملک کی سیکیورٹی فورسز نے آپریشنز کرکے ان کی بیخ کنی کی کوشش کی ہے۔

ان حملوں اور اس کے جواب میں کی جانے والی سیکیورٹی فورسز کی کارروائیوں میں سیکڑوں سیکیورٹی فورسز اہلکار و افسران اور شہری ہلاک جبکہ ایک بڑی تعداد میں دہشت گرد ہلاک و گرفتار کیے جا چکے ہیں۔