بلوچستان: چمن میں نامعلوم افراد کی فائرنگ، دو اہلکار ہلاک

کوئٹہ (بیورو رپورٹ) پاکستان کے صوبہ بلوچستان کے افغانستان سے متصل سرحدی شہر چمن میں نامعلوم افراد کی فائرنگ سے حساس ادارے کے 2 اہلکار ہلاک ہو گئے۔

سیکورٹی ذرائع کے مطابق اتوار کو ضلع قلعہ عبد اللہ کی تحصیل چمن میں سرحد پر تصدق گیٹ پر ڈیوٹی ختم کر نے کے بعد دو اہلکار جا رہے تھے کہ نامعلوم افراد نے ان پر فائرنگ کر دی جس کے نتیجے میں نائیک ہاشم اور سپاہی ناصر شدید زخمی ہوگئے جنہیں طبی امداد کے لئے کوئٹہ منتقل کیا جا رہا تھا کہ راستے میں وہ زخموں کی تاب نہ لاتے ہوئے دم توڑ گئے۔

لیویز، فرنٹیئر کور اور سیکورٹی فورسز نے جائے وقوعہ پر پہنچ کر شواہد اکھٹے کر لئے اور حملہ آوروں کی تلاش شروع کر دی۔