بلوچستان : پولیس اسٹیشن پر دہشتگردوں کا حملہ، جوابی کارروائی میں 3 حملہ آور ہلاک

کچھی(ڈیلی اردو) بلوچستان کے شورش زدہ ضلع کچھی کے علاقے بھاگ ناری میں دہشتگردوں نے پولیس اسٹیشن کو نشانہ بنانے کی کوشش کی، تاہم پولیس، سیکیورٹی اہلکاروں اور مقامی افراد کی بروقت مزاحمت کے باعث حملہ پسپا ہوگیا۔ فائرنگ کے تبادلے میں 3 دہشتگرد ہلاک ہوگئے۔

دستیاب اطلاعات کے مطابق مسلح دہشتگردوں کے ایک گروپ نے بھاگ ناری کے پولیس اسٹیشن پر حملہ کرنے کی کوشش کی۔ حملے کے وقت پولیس اہلکاروں نے فوری ردعمل دیتے ہوئے دہشتگردوں کے خلاف کارروائی شروع کردی، جبکہ سیکیورٹی اہلکاروں اور مقامی افراد نے بھی پولیس کا ساتھ دیا۔

پولیس اور سیکیورٹی اہلکاروں کی مزاحمت کے نتیجے میں حملہ آوروں کو پیش قدمی کا موقع نہیں مل سکا اور فائرنگ کے تبادلے کے دوران 3 دہشتگرد ہلاک ہوگئے۔

حکام کے مطابق واقعے کے بعد علاقے میں سیکیورٹی مزید سخت کردی گئی ہے جبکہ حملے میں ملوث دیگر ممکنہ افراد کی موجودگی کا سراغ لگانے کے لیے سرچ کارروائی بھی کی جارہی ہے۔

حکام کا کہنا ہے کہ دہشتگردی کے خلاف کارروائیوں میں پولیس، سیکیورٹی اداروں اور مقامی آبادی کے درمیان تعاون اہم کردار ادا کرتا ہے۔ بھاگ ناری میں پیش آنے والے واقعے کے بعد بھی علاقے کی سیکیورٹی اور امن و امان برقرار رکھنے کے لیے اقدامات جاری ہیں۔