بلوچستان: 216 عسکریت پسند ہلاک، ’آپریشن رد الفتنہ-1‘ مکمل، فوج کا دعویٰ

اسلام آباد (ڈیلی اردو) پاکستانی سکیورٹی فورسز نے شورش زدہ صوبے بلوچستان میں جاری آپریشن ردالفتنہ-1 کامیابی سے مکمل کرنے کا دعویٰ کیا ہے۔

پاکستانی فوج نے جمعرات کو بتایا کہ پنجگور اور ہرنائی میں 216 عسکریت پسند مارے گئے ہیں اور ان کے خلاف شروع کیا گیا سکیورٹی آپریشن ختم ہو چکا ہے۔

پاکستانی فوج کے شعبہ تعلقات عامہ، انٹر سروسز پبلک ریلیشنز (آئی ایس پی آر) کے مطابق سکیورٹی فورسز نے بلوچستان میں کامیابی سے مکمل کر لیا ہے۔ اس دوران ’’بھارت کی سرپرستی میں سرگرم دہشت گرد عناصر‘‘ کے خلاف کئی روز تک جاری کلیئرنس کارروائیوں میں مجموعی طور پر 216 دہشت گرد ہلاک کیے گئے۔

یہ پیش رفت 31 جنوری کو بلوچستان بھر میں ہونے والے حملوں کے بعد سامنے آئی، جن کے باعث صوبے کے کئی حصے کئی دنوں تک مفلوج رہے۔

آئی ایس پی آر کے مطابق، ’’ان مربوط کارروائیوں اور بعد ازاں کلیئرنس آپریشنز کے نتیجے میں 216 دہشت گردوں کو ہلاک کیا گیا، جس سے دہشت گرد نیٹ ورکس کی قیادت، کمانڈ اینڈ کنٹرول ڈھانچوں اور عملی صلاحیتوں کو شدید نقصان پہنچا۔‘‘

آئی ایس پی آر نے بتایا کہ ان کارروائیوں کے دوران 36 شہری، جن میں خواتین اور بچے بھی شامل ہیں، جان سے گئے، جبکہ 22 سکیورٹی اہلکار بھی مارے گئے۔

بلوچستان کے وزیر اعلیٰ سرفراز بگٹی نے ایکس پر ایک بیان میں کہا کہ یہ آپریشن ’’بلوچستان میں خونریزی کرنے والوں کے لیے واضح پیغام‘‘ ہے۔

انہوں نے کہا کہ کالعدم بلوچ لبریشن آرمی (بی ایل اے) ’’ایک فتنہ ہے جو بے گناہ شہریوں اور مزدوروں کو نشانہ بنا رہی ہے‘‘ اور دہرایا کہ یہ گروہ مبینہ طور پر “بھارت کے کہنے پر کام کر رہا ہے۔‘‘