بنوں میں بکتربند گاڑی پر خودکش حملہ، لیفٹننٹ کرنل سمیت 6 اہلکار ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں میں بکتربند گاڑی پر خودکش حملے میں لیفٹننٹ کرنل سمیت 6 اہلکار ہلاک جبکہ متعدد زخمی ہو گئے۔

ذرائع کے مطابق ٹوچی پل کے قریب سکیورٹی فورسز کی بکتربند گاڑی کو مبینہ طور پر موٹر سائیکل سوار خودکش حملہ آور نے نشانہ بنایا۔ بنوں میں سکیورٹی فورسز کے قافلے پر ہونے والے اس حملے میں پانچ اہلکار اور ایک شہری ہلاک جبکہ متعدد زخمی ہو گئے۔

اطلاعات کے مطابق حملہ اس وقت پیش آیا جب سکیورٹی فورسز کا قافلہ معمول کی گشت پر تھا۔ موٹر سائیکل سوار خودکش حملہ آور نے بکتربند گاڑی سے خود کو ٹکرا دیا جس کے نتیجے میں زور دار دھماکہ ہوا اور گاڑی کو شدید نقصان پہنچا۔ دھماکے کی آواز دور دور تک سنی گئی اور علاقے میں خوف و ہراس پھیل گیا۔

دھماکے کے فوراً بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا جبکہ زخمی اہلکاروں کو فوری طور پر قریبی ہسپتال منتقل کیا گیا۔

ذرائع کے مطابق بعض زخمیوں کی حالت تشویشناک بتائی جا رہی ہے جس کے باعث ہلاکتوں میں اضافے کا خدشہ ظاہر کیا جا رہا ہے۔

علاقے میں سکیورٹی ہائی الرٹ کر دی گئی ہے اور داخلی و خارجی راستوں پر چیکنگ سخت کر دی گئی ہے۔ تاحال کسی تنظیم نے حملے کی ذمہ داری قبول نہیں کی۔

نوٹ: یہ ابتدائی خبر ہے جس میں تفصیلات شامل کی جا رہی ہیں۔