بنوں میں عسکریت پسندوں کا خونریز سلسلہ: پولیس اہلکار ہلاک، راکٹ حملہ، کیمپ جلایا گیا

بنوں (ڈیلی اردو رپورٹ) پاکستان کے شورش زدہ صوبے خیبر پختونخوا کے ضلع بنوں میں عسکریت پسندوں نے ایک پولیس اہلکار کو گھر کے سامنے فائرنگ کر کے ہلاک کر دیا۔

پولیس کے مطابق واقعہ تھانہ ہوید کی حدود میں پیش آیا، جہاں موٹرسائیکل سوار عسکریت پسندوں نے پولیس اہلکار اقبال مزنگہ کو گھر کے سامنے نشانہ بنایا۔ فائرنگ کے نتیجے میں اہلکار موقع پر ہی ہلاک ہوگئے۔

پولیس حکام کا کہنا ہے کہ اقبال مزنگہ پولیس چوکی میں تعینات تھے۔ فائرنگ کے بعد عسکریت پسند موقع سے فرار ہوگئے، جن کی تلاش کے لیے علاقے میں ناکہ بندی کر دی گئی۔ واقعے کی تفتیش شروع کر دی گئی ہے اور پولیس نے عزم ظاہر کیا ہے کہ ملزمان کو جلد قانون کے کٹہرے میں لایا جائے گا۔

تھانہ مریان پر عسکریت پسندوں کی راکٹ حملہ

عسکریت پسندوں نے تھانہ مریان کو نشانہ بناتے ہوئے دو راکٹ فائر کیے۔ حملے کے نتیجے میں کوئی جانی نقصان نہیں ہوا، تاہم راکٹ لگنے سے پولیس اسٹیشن کی دیوار کو نقصان پہنچا۔

سرکلر روڈ پر نجی کمپنی کے کیمپ پر حملہ، مشینری جلا دی گئی

نجی کمپنی کے کیمپ پر حملہ

ضلع بنوں کے سرکلر روڈ پر نجی کمپنی کے کیمپ پر عسکریت پسندوں نے حملہ کیا۔ پولیس کے مطابق 20 سے 25 عسکریت پسندوں نے گزشتہ رات کیمپ میں داخل ہو کر موجود تمام کنسٹرکشن کی مشینری جلا دی۔ پولیس نے علاقے کو گھیرے میں لے کر تفتیش شروع کر دی ہے۔

دہشت گردی کا بڑا منصوبہ ناکام

بنوں کے علاقے بکا خیل احمدزیی میں سیکیورٹی فورسز نے مین روڈ پر نصب بھاری مقدار میں بارودی مواد کو ناکارہ بنا دیا۔ 

ذرائع کے مطابق بارودی مواد ایک ڈرم میں رکھا گیا تھا، جسے انتہائی مہارت کے ساتھ ناکارہ بنا کر کسی بھی ممکنہ جانی و مالی نقصان سے بچا لیا گیا۔

سیکیورٹی فورسز کی اس کارروائی کے نتیجے میں علاقے کو بڑی تباہی سے محفوظ بنا لیا گیا۔