بنوں میں عسکریت پسندوں کے حملوں میں پولیس اہلکار سمیت دو افراد ہلاک، متعدد زخمی

بنوں (ڈیلی اردو رپورٹ) پاکستان کے شورش زدہ صوبے خیبر پختونخوا کے ضلع بنوں میں سیکیورٹی فورسز اور عسکریت پسندوں کے درمیان شدید جھڑپوں کے واقعات سامنے آئے ہیں، جن میں ایک پولیس اہلکار ہلاک جبکہ متعدد زخمی ہوئے ہیں۔

مٹکی بیزن خیل تعزیری میں فائرنگ، پولیس اہلکار ہلاک

بنوں کے علاقے مٹکی بیزن خیل تعزیری میں پولیس اور عسکریت پسندوں کے درمیان شدید فائرنگ کا تبادلہ ہوا، جس کے نتیجے میں پولیس اہلکار صدام ہلاک ہو گیا۔

حملے کے بعد سیکیورٹی فورسز نے علاقے میں سرچ آپریشن شروع کر دیا ہے اور دہشت گردوں کی گرفتاری کے لیے کارروائیاں جاری ہیں۔

درازندہ: ڈرون حملہ، ایف سی پوسٹ پر گولے داغے گئے

درازندہ میں ایف سی پوسٹ لونی کے قریب واقع لونی اسکول پر دہشت گردوں نے کوآڈ کوپٹر کے ذریعے دو گولے فائر کیے۔ اس حملے میں ایک اہلکار ہلاک جبکہ تین اہلکار زخمی ہو گئے۔ زخمیوں کو طبی امداد کے لیے قریبی ہسپتال منتقل کر دیا گیا ہے۔

کھلونا نما بم پھٹنے سے دو بچے زخمی

بنوں کے تھانہ ڈومیل کی حدود میں کھلونا نما بم پھٹنے سے دو بچے عامر اور عمر زیب زخمی ہو گئے۔ زخمی بچوں کو خلیفہ گل نواز ہسپتال منتقل کیا گیا، جہاں ہسپتال ذرائع کے مطابق ایک بچے کی حالت تشویشناک بتائی جا رہی ہے۔