بنوں میں پولیس گاڑی پر دہشت گردوں کا حملہ، افسر ہلاک، 3 اہلکار زخمی

بنوں (ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں پولیس موبائل پر دہشت گردوں کے حملے کے نتیجے میں ایک پولیس افسر ہلاک جبکہ تین اہلکار زخمی ہو گئے، جبکہ جوابی کارروائی میں دو حملہ آور بھی ہلاک کر دیے گئے۔

بنوں پولیس کے مطابق تھانہ ہوید کی پولیس موبائل معمول کی گشت پر تھی کہ زرگر ممہ خیل کے علاقے میں گھات لگا کر حملہ کیا گیا۔ حملے کے نتیجے میں اسسٹنٹ سب انسپکٹر دلنواز موقع پر ہلاک ہو گئے جبکہ تین اہلکار زخمی ہوئے۔ حملہ آوروں نے کارروائی کے بعد پولیس موبائل کو نذرِ آتش بھی کر دیا۔

ڈی آئی جی بنوں سجاد خان کے مطابق واقعے کی اطلاع ملتے ہی پولیس کی اضافی نفری موقع پر پہنچ گئی، علاقے کو گھیرے میں لے کر سرچ آپریشن شروع کیا گیا۔ ان کا کہنا ہے کہ جوابی کارروائی میں دو عسکریت پسند ہلاک جبکہ چار زخمی ہوئے ہیں۔

ڈی آئی جی کے مطابق دہشت گردوں کے قبضے سے دو موٹر سائیکلیں بھی برآمد کی گئی ہیں۔

سجاد خان نے کہا کہ دہشت گردوں کا ہر صورت پیچھا کیا جائے گا اور انہیں کہیں بھی چھپنے کی جگہ نہیں دی جائے گی۔ 

انہوں نے واضح کیا کہ بزدلانہ کارروائیوں سے پولیس کے حوصلے پست نہیں کیے جا سکتے۔

دوسری جانب وزیر اعلیٰ خیبرپختونخواہ سہیل آفریدی نے واقعے کی مذمت کرتے ہوئے آئی جی پولیس سے رپورٹ طلب کر لی ہے۔ انہوں نے ہلاک ہونے والے پولیس افسر کے لواحقین کے لیے صبر و استقامت کی دعا کی اور کہا کہ ملک کے لیے جان  دینے والے اہلکار کی قربانی رائیگاں نہیں جائے گی۔