بنوں: کالعدم تنظیم کے کمانڈر کا والد نامعلوم افراد کی فائرنگ سے ہلاک

بنوں (ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں نامعلوم مسلح افراد کی فائرنگ سے کالعدم تنظیم کے کمانڈر شوکت عرف عادل کا والد گل ریاض ہلاک ہو گیا۔

پولیس کے مطابق واقعہ تھانہ منڈان کی حدود میں پیش آیا، جہاں نامعلوم حملہ آوروں نے گل ریاض کو نشانہ بنایا اور موقع سے فرار ہو گئے۔ 

ابتدائی تحقیقات کے مطابق گل ریاض کالعدم تنظیم تحریک طالبان پاکستان (ٹی ٹی پی) کے لیے سہولت کاری میں ملوث تھا اور تنظیم کی پشت پناہی کے ساتھ ساتھ مالی معاونت بھی فراہم کرتا رہا۔

مقامی ذرائع کا کہنا ہے کہ شوکت عرف عادل پولیس اہلکاروں پر ٹارگٹ کلنگ اور دیگر دہشت گردانہ کارروائیوں میں طویل عرصے سے ملوث رہا ہے اور سیکیورٹی اداروں کو انتہائی مطلوب ہے۔

اس حوالے سے ایس ایچ او تھانہ منڈان نے بتایا کہ ٹی ٹی پی کے کمانڈر شوکت عرف عادل کے والد کو گزشتہ رات نامعلوم مسلح افراد نے فائرنگ کر کے ہلاک کیا، جبکہ مقتول تنظیم کے لیے بطور سہولت کار کام کرتا تھا۔ واقعے کی تحقیقات جاری ہیں۔