بھارتی فضائیہ کا مگ 21 لڑاکا طیارہ گر کر تباہ، ونگ کمانڈر ہلاک

نئی دہلی (ڈیلی اردو/شِنہوا) بھارت کی مغربی ریاست راجستھان میں بھارتی فضائیہ (آئی اے ایف) کا ایک مگ 21 لڑاکا طیارہ گر کر تباہ ہو گیا ہے۔

بھارتی میڈیا رپورٹس کے مطابق راجستھان میں جیسلمیر کے مقام پر پاک بھارت سرحد کے قریب سواد سیری گاؤں میں مگ 21 طیارہ گر کر تباہ ہوا، حادثے میں ونگ کمانڈر ہرشیت سنہا ہلاک ہوگئے۔

بھارتی فضائیہ کی جانب سے جاری ایک بیان میں کہا گیا ہے کہ آج شام تقریباً 8 بجکر 30 منٹ (مقامی وقت) پر مغربی سیکٹر میں تربیتی پرواز کرنے والا آئی اے ایف کا ایک مگ 21 طیارہ فضائی حادثے کا شکار ہو گیا ہے۔

مقامی پولیس جائے حادثہ پہنچ گئی، حادثے کی تحقیقات شروع کردی گئی ہیں۔

This evening, around 8:30 pm, a MiG-21 aircraft of IAF met with a flying accident in the western sector during a training sortie. Further details are awaited.
An inquiry is being ordered.

— Indian Air Force (@IAF_MCC) December 24, 2021

مقامی میڈیا کی خبروں میں پولیس کے حوالے سے بتایا گیا ہے کہ یہ طیارہ راجستھان کے ضلع جیسلمیر کے سام تھانہ کی حدود میں واقع ڈیزرٹ نیشنل پارک کے علاقے میں گر کر تباہ ہوا۔

آئی اے ایف کے مطابق حادثے کی تحقیقات کا حکم دیدیا گیا ہے۔

بھارتی میڈیا رپورٹس کے مطابق صرف ایک سال میں مگ 21 کے کئی حادثے رپورٹ ہوئے ہیں۔

بھارتی حکومت نے مئی 2012 میں پارلیمنٹ کو بتایا تھا کہ 1971 سے اپریل 2012 تک 482 مگ طیارے حادثات کا شکار ہو چکے ہیں جن میں 171 پائلٹ، 39 شہری، 8 سروس اہلکار اور ایک ہوائی عملے کا شخص ہلاک ہو چکا ہے۔