بھارت میں لینڈ سلائیڈنگ سے فوجی کیمپ تباہ، 20 اہلکار ہلاک، 50 سے زائد لاپتہ

نئی دہلی (ڈیلی اردو) بھارتی ریاست منی پور میں لینڈ سلائیڈنگ کے دوران مٹی کا تودہ بھارتی فوج کے کیمپ پر گرا جس کے ملبے تلے دب کر 9 بھارتی فوجیوں سمیت 20 افراد ہلاک اور 50 سے زائد لاپتہ ہوگئے۔

بھارتی میڈیا کے مطابق ریاست منی پور میں امپھال جریبام ریلوے پروجیکٹ میں تعمیراتی کام کے دوران مٹی کا بڑا تودہ آن گرا۔ پروجیکٹ کی حفاظت کے لئے قائم کی گئی فوجی چیک پوسٹ لینڈ سلائیڈنگ میں تباہ ہوگئی۔

مٹی کا تودہ گرنے سے ملبے تلے 100 سے زائد اہلکار دب گئے۔ ریسکیو ادارے نے امدادی کاموں کے دوران 20 افراد کی لاشیں نکالی ہیں جن میں سے ایک ریلوے ملازم اور 7 فوجی اہلکار ہیں۔

بھارتی میڈیا کے مطابق ہلاک شدگان اور زخمیوں میں فوجی اور ریلوے اہلکار بھی شامل ہیں جو وہاں ایک زیر تعمیر ریلوے یارڈ اور اس سے ملحقہ ایک سیکیورٹی کیمپ میں موجود تھے۔

ریسکیو ٹیم کے انچارج کا کہنا ہے کہ ملبے تلے اب بھی 50 سے زائد افراد کے دبے ہونے کا خدشہ ہے۔ جن کی تلاش کا کام جاری ہے تاہم موسم کی خرابی کے باعث امدادی کاموں میں مشکلات کا سامنا ہے۔

گذشتہ روز ہونے والی لینڈ سلائیڈنگ میں اب تک 25 افراد کو ریسکیو کیا جاچکا ہے جبکہ 50 سے زائد افراد لاپتہ ہیں.۔

وزارت دفاع کے پبلک ریلیشن آفیسر کی جانب سے جاری بیان میں بتایا گیا ہے کہ ریلوے پروجیکٹ کی حفاظت پر مامور ٹیم فوجی رضاکاروں پر مشتمل ٹریٹوریل آرمی کی ٹیم کر رہی تھی۔

یہ فوجی رضاکار سویلین ہوتے ہیں اور مختلف شعبہ ہائے زندگی سے تعلق رکھنے تھے تاہم رضاکارانہ طور پر فوج میں بھرتی ہوتے ہیں۔

آسام میں علیحدگی پسندوں کے حملوں کے باعث ریلوے اہلکاروں کی حفاظت کیلئے بھارتی فوج کو تعینات کیا گیا تھا۔