بیت المقدس: چاقو سے حملے میں اسرائیلی فوجی سمیت 2 افراد زخمی، فلسطینی حملہ آور مارا گیا

بیت المقدس (ڈیلی اردو) اسرائیلی پولیس نے کہا ہے کہ بیت المقدس میں پیر کے روز چاقو سے مسلح فلسطینی شہری نے حملہ کر کے ایک اسرائیلی فوجی اور ایک عام شہری کو زخمی کر دیا ہے جس پر اسے گولی مار کر ہلاک کر دیا گیا ہے۔

پولیس کے بیان میں کہا گیا ہے کہ مشتبہ شخص نے الشیخ جراح محلے کے نزدیک ایک لائٹ ریل اسٹاپ کے باہر ایک 21 سالہ اسرائیلی فوجی اور ایک 23 سالہ مرد پر چاقو سے حملہ کیا۔ الشیخ جراح میں فلسطینیوں کو ان کے گھروں سے بے دخل کرنے کے اسرائیلی منصوبے پر فلسطینیوں اور اسرائیلی پولیس کے مابین جھڑپیں جاری ہیں۔

بیان کے مطابق سرحدی پولیس کے ایک اہلکار نے فلسطینی مشتبہ شخص کو گولی ماری اور جائے وقوعہ پر ہی اس کی موت کی تصدیق ہوگئی۔

اسرائیل نے 1967ء کی مشرق وسطیٰ جنگ میں زمین پر قبضہ کرنے کے فوراً بعد ہی مشرقی بیت المقدس کا اپنے ساتھ الحاق کر لیا تھا، اکثریتی بین الاقوامی برادری نے اس اقدام کو تسلیم نہیں کیا ہے۔