تحریک طالبان پاکستان نے اسلام آباد چیک پوسٹ پر حملہ کی ذمہ داری قبول کرلی

اسلام آباد (ڈیلی اردو/اے ایف پی) پاکستان کے وفاقی دارالحکومت اسلام آباد میں پیر کی شب پولیس ناکے پر نامعلوم حملہ آوروں کی فائرنگ کے واقعے کو حکام نے دہشت گردی قرار دیا ہے۔

اسلام آباد کے علاقے سیکٹر جی ایٹ میں پیر کی شب دو موٹر سائیکل سوار مسلح افراد نے پولیس کی چیک پوسٹ پر فائرنگ کی جس کے نتیجے میں ایک پولیس افسر ہلاک اور دو زخمی ہو گئے تھے۔

پولیس کی جوابی فائرنگ میں دونوں حملہ آور بھی مارے گئے تھے۔

اسلام آباد پولیس کے ایک سینئر افسر شاہد زمان نے فرانسیسی خبر رساں ادارے ‘اے ایف پی’ سے گفتگو میں واقعے کو دہشت گردی کی کارروائی قرار دیا ہے۔

اسلام آباد پولیس کی جانب سے جاری کیے گئے ایک بیان میں بھی کہا گیا ہے کہ واقعے میں ایک پولیس اہل کار ہلاک اور دو زخمی ہو گئے ہیں۔ پولیس کا کہنا ہے کہ واقعے میں دونوں حملہ آور بھی مارے گئے ہیں۔

اسلام آباد پولیس کا ایک اور سپوت وطن کی مٹی پر قربان ہو گیا۔

آئی جی اسلام آباد محمد احسن یونس نے سینئر افسران کے ہمراہ کراچی کمپنی میں ہونے والی دہشت گردی کی جائے وقوعہ کا دورہ کیا، افسران کو مناسب ہدایات جاری کیں۔#IslamabadPolice pic.twitter.com/ZCBVyGyeZt

— Islamabad Police (@ICT_Police) January 17, 2022

پاکستان کے وفاقی وزیرِ داخلہ شیخ رشید احمد نے واقعے کی انکوائری کا حکم دیا ہے۔

دوسری جانب کالعدم تنظیم تحریک طالبان پاکستان (ٹی ٹی پی) نے واقعے کی ذمہ داری بھی قبول کر لی ہے۔

ترجمان محمد خراسانی نے پولیس کی چوکی پر فائرنگ کی ذمے داری قبول کرتے ہوئے کہا کہ پولیس کی جوابی کارروائی میں ان کے دو مجاہدین بھی مارے گئے۔ گزشتہ ایک ماہ کے دوران پاکستان میں کالعدم ٹی ٹی پی کی کارروائیوں میں اضافہ دیکھا جا رہا ہے۔

حکومتِ پاکستان نے گزشتہ برس ٹی ٹی پی کے ساتھ مذاکرات کا سلسلہ شروع کیا تھا جس کے بعد ایک ماہ کی عارضی جنگ بندی پر بھی اتفاق ہوا تھا۔ لیکن یہ مذاکرات نتیجہ خیز ثابت نہ ہو سکے۔

پاکستانی فوج کے ترجمان میجر جنرل بابر افتحار نے حالیہ پریس کانفرنس میں کہا تھا کہ ٹی ٹی پی کے ساتھ جنگ بندی معاہدہ نو دسمبر کو ختم ہو گیا تھا جس کے بعد گروپ کے خلاف کارروائیاں جاری ہیں۔