جب تک دہشت گردی کے ناسور کو دفن نہیں کرتے، چین سے نہیں بیٹھیں گے، وزیراعظم شہباز شریف

اسلام آباد (ڈیلی اردو) وزیراعظم شہباز شریف نے اکوڑہ خٹک میں جمعے کے روز ہونے والے دھماکے اور اس کے نتیجے میں مولانا حامد الحق سمیت دیگر افراد کی ہلاکتوں پر مذمت کرتے ہوئے کہا ہے کہ اس وقت تک چین سے نہیں بیٹھیں گے جب تک دہشت گردی کے اس ناسور کو دفن نہیں کر دیتے۔‘

اسلام آباد میں رمضان پیکیج 2025 کے اعلان کی تقریب سے خطاب میں شہباز شریف نے کہا کہ ’اکوڑہ خٹک میں خودکش دھماکے میں مولانا حامد الحق سمیت دیگر پاکستانیوں کی ہلاکت ایک المناک واقعہ ہے، یہ قدیم جامعہ ہے۔ جہاں اسلامی و عصری تعلیم فراہم کی جاتی ہے۔ اس واقعے پر قوم افسردہ ہے۔‘

انھوں نے خطاب میں کہا کہ ’ایسی قبر کھو دیں گے دوبارہ دیشت گردی کے ناسور کا نکلنا ممکن نہیں ہوگا۔امید ہے کہ خیبرپختونخوا حکومت ان قاتلوں کو گرفتار کر کے قرار واقعی سزا دے گی۔‘

انھوں نے تقریب میں کہا کہ رمضان پیکیج کے ذریعے 40 لاکھ گھرانوں (تقریباً 2 کروڑ پاکستانیوں) کو ڈیجیٹل والٹ کے ذریعے پانچ ہزار روپے فی خاندان فراہم کیے جائیں گے۔

انھوں نے دعویٰ کیا کہ اس سال رمضان المبارک کے مہینے میں مہنگائی پہلے سے کم ہے۔

انھوں نے کہا کہ ہم یوٹیلیٹی سٹورز سے جان چھڑوا کر انھیں بہتر بنا کر ان کی نجکاری کی جائے گی، اس سال رمضان پیکیج کے لیے لائنیں نہیں لگیں گی بلکہ با عزت طور پر لوگوں کو ڈیجیٹل والٹ سے ریلیف مل جائے گا۔