جعفرآباد: ڈیرہ اللہ یار میں دھماکا، 4 پولیس اہلکاروں سمیت 17 افراد زخمی

جعفرآباد (ڈیلی اردو) صوبہ بلوچستان کے ضلع جعفر آباد کے صدر مقام ڈیرہ اللہ یار کے مصروف ترین صحبت پور چوک پر بم دھماکے میں ٹریفک پولیس کے چار اہلکاروں سمیت 17 افراد زخمی ہوگئے۔ 5 زخمیوں کو تشویشناک حالت میں لاڑکانہ منتقل کر دیا گیا۔

اتوار کے سہ پہر نامعلوم ملزمان نے صحبت پور چوک پر دھماکا کر دیا جسکے نتیجے میں ڈیوٹی پر مامور ٹریفک پولیس کے چار اہلکار منیر علی اور انور علی سمیت 17 افراد زخمی ہوگئے۔

زخمیوں میں کنڈو گونگا، حیدر خان ،عبدالرشید، حبیب اللہ، مجن علی میربحر، عبدالرسول، محمد علی کھوسہ، اللہ ڈنہ چھلگری، وزیر خان بگٹی، محمد سرور رند، رحمت اللہ میربحر، منیر علی ٹریفک اہلکار، انور علی، فرہاد علی رند، محمد سلیم میر بحر، سلیم سومرو، شمن علی سومرو و دیگر افراد شامل ہیں۔

دھماکے کی فوری اطلاع پر تھانہ ڈیرہ اللہ یار کے ایس ایچ او عبدالروف جمالی اور سی آئی اے کے طارق بہرانی نفری کے ہمراہ جائے وقوع پر پہنچ گئے اور زخمیوں کو پولیس موبائل و دیگر گاڑیوں کے ذریعے فوری طور پر ڈسٹرکٹ ہیڈ کوارٹر ہسپتال پہنچایا گیا ہسپتال میں ایمرجنسی نافذ کرکے زخمیوں کو طبی امداد دی گئی۔

دوران علاج ٹریفک اہلکاروں سمیت پانچ افراد کی حالت تشویشناک ہونے کے باعث انہیں ایمبولینس پر لاڑکانہ چانڈکا ہسپتال منتقل کر دیا گیا۔

ڈیرہ اللہ یار میں دھماکے کی اطلاع پر ایس ایس پی صحبت پور میر حسین احمد لہڑی جائے وقوع پر پہنچے اور دھماکے کی جگہ کو سیل کر کے شواہد اکھٹے کیے گئے۔

پولیس کے مطابق دھماکا ہینڈ گرنیڈ بم سے کیا گیا اور ملزمان کا ہدف ٹریفک پولیس کے اہلکار تھے۔ دھماکے بعد پولیس نے علاقے کی ناکہ بندی کرکے چیکنگ کا سلسلہ شروع کر دیا ہے۔