جنوبی وزیرستان: مکین میں جھڑپ، 4 مبینہ دہشت گرد، 4 سیکیورٹی اہلکار ہلاک

راولپنڈی (ڈیلی اردو) صوبہ خیبر پختونخوا کے قبائلی ضلع جنوبی وزیرستان میں سکیورٹی فورسز اور دہشتگردوں کے درمیان جھڑپ میں 4 اہلکار ہلاک ہوگئے جب کہ 4 مبینہ دہشت گرد بھی مارے گئے۔

پاکستان فوج کی شعبہ تعلقات عامہ آئی ایس پی آر کے مطابق جنوبی وزیرستان کے علاقے مکین میں سکیورٹی فورسز اور دہشتگردوں کا مقابلہ ہوا اور اس دوران دہشتگردوں کی فائرنگ سے 4 اہلکار ہلاک ہوگئے۔

آئی ایس پی آر کے مطابق سکیورٹی فورسز کی جوابی فائرنگ کے نتیجے میں 4 دہشت گرد بھی مارے گئے۔

آئی ایس پی آر کے مطابق ہلاک ہونے والے اہلکاروں میں لانس نائیک عمران علی، سپاہی عاطف جہانگیر، سپاہی عزیز اورسپاہی انیس الرحمان شامل ہیں۔

آئی ایس پی آر کا بتانا ہے کہ سیکیورٹی فورسز کی جانب سے علاقے میں کلیئرنس آپریشن کیا جارہا ہے۔