جنوبی وزیرستان کی مسجد میں دھماکا, جے یو آئی رہنما مولانا عبداللہ سمیت 4 افراد زخمی

وانا (ل و) صوبہ خیبر پختونخوا کے قبائلی ضلع جنوبی وزیرستان کے علاقے اعظم ورسک بازار میں واقع مولانا عبدالعزیز مسجد کے اندر نماز جمعہ کے دوران ایک زوردار دھماکہ ہوا، جس کے نتیجے میں جمعیت علمائے اسلام (جے یو آئی) وانا کے امیر، مولانا عبداللہ ندیم سمیت متعدد افراد زخمی ہوگئے ہیں۔ پولیس اور مقامی ذرائع کے مطابق، دھماکے کے باعث ہلاکتوں کا خدشہ بھی ظاہر کیا جا رہا ہے۔

امدادی کارروائیاں فوری طور پر شروع کر دی گئی ہیں، اور زخمیوں کو ڈسٹرکٹ ہیڈکوارٹر ہسپتال وانا منتقل کیا گیا ہے۔ سیکیورٹی فورسز اور پولیس نے علاقے کو گھیرے میں لے کر تحقیقات کا آغاز کر دیا ہے۔

ضلعی پولیس افسر آصف بہادر نے بتایا کہ بظاہر ایک دیسی ساختہ بم ممبر کے قریب نصب کیا گیا تھا اور بظاہر ایسا لگتا ہے کہ اس حملے میں مولانا عبد اللہ ندیم کو نشانہ بنانا تھا۔

یہ پہلا موقع نہیں ہے جب مولانا عبداللہ ندیم کو نشانہ بنایا گیا ہو۔ ذرائع کے مطابق، اس سے قبل بھی کالوشہ کے مقام پر ان پر ریموٹ کنٹرول دھماکہ ہوا تھا، جس میں وہ زخمی ہو گئے تھے۔

تاحال کسی گروہ نے اس حملے کی ذمہ داری قبول نہیں کی ہے، جبکہ قانون نافذ کرنے والے ادارے واقعے کے محرکات کا جائزہ لے رہے ہیں۔