جنوبی وزیرستان : سکیورٹی فورسز کا انٹیلی جنس بیسڈ آپریشن، 3 دہشتگرد ہلاک، اسلحہ و گولہ بارود برآمد

جنوبی وزیرستان(ڈیلی اردو) سکیورٹی فورسز نے خیبرپختونخواہ کے شورش زدہ قبائلی ضلع جنوبی وزیرستان میں خفیہ اطلاعات کی بنیاد پر کارروائی کرتے ہوئے 3 دہشتگردوں کو ہلاک کر دیا، جبکہ کارروائی کے دوران اسلحہ اور گولہ بارود بھی برآمد کیا گیا۔

فراہم کردہ اطلاعات کے مطابق علاقے میں دہشتگردوں کی موجودگی اور نقل و حرکت سے متعلق معلومات ملنے پر سکیورٹی فورسز نے نگرانی کے بعد کارروائی کی۔ پہلے راکٹ حملہ کیا گیا، جس کے بعد قریبی فاصلے پر فائرنگ کا تبادلہ ہوا۔ کارروائی کے نتیجے میں تین دہشتگرد ہلاک ہوئے۔

رپورٹ میں ہلاک ہونے والے افراد کو کالعدم تحریک طالبان پاکستان (ٹی ٹی پی) سے منسلک دہشتگرد قرار دیا گیا ہے، تاہم ان کی شناخت اور برآمد ہونے والے اسلحے کی نوعیت کے بارے میں مزید تفصیلات فراہم نہیں کی گئیں۔