جنوبی وزیرستان : ڈرون حملے سے سکیورٹی اہلکار ہلاک، درابن میں پولیس پر 3 حملے ناکام

جنوبی وزیرستان/ڈیرہ اسماعیل خان(ڈیلی اردو) خیبرپختونخواہ کے شورش زدہ ضلع جنوبی وزیرستان کے علاقے وانا میں ڈیوٹی کے دوران مبینہ ڈرون حملے میں سرائے نورنگ سے تعلق رکھنے والا سکیورٹی اہلکار رضوان اللہ ہلاک ہوگیا، جبکہ ڈیرہ اسماعیل خان کی تحصیل درابن میں 37 گھنٹوں کے دوران پولیس کو نشانہ بنانے کی تین کوششیں ناکام بنادی گئیں۔

ذرائع کے مطابق رضوان اللہ ولد قسم خان گزشتہ روز وانا میں ڈیوٹی انجام دے رہا تھا جب وہ ڈرون حملے کی زد میں آیا۔ اس کی نماز جنازہ اتوار کو آبائی علاقے سرائے نورنگ میں سرکاری اعزاز کے ساتھ ادا کی گئی۔

دوسری جانب درابن میں 4 ستمبر سے 5 ستمبر کے دوران پولیس کو تین مختلف مواقع پر نشانہ بنانے کی کوشش کی گئی۔ ذرائع کے مطابق پہلے واقعے میں مسلح افراد نے درابن پولیس کی ایک اہم چیک پوسٹ پر حملہ کرنے کی کوشش کی، تاہم پولیس کی بروقت جوابی کارروائی کے باعث حملہ آور پسپا ہوگئے۔ اس واقعے میں پولیس اہلکاروں کے جانی نقصان کی اطلاع نہیں ملی۔

بعد ازاں سرچ آپریشن سے واپس آنے والے کاؤنٹر ٹیرارزم ڈیپارٹمنٹ کے پولیس قافلے کو بھی نشانہ بنانے کی کوشش کی گئی، جس کے نتیجے میں پولیس کی گاڑیوں کو نقصان پہنچا۔

اسی رات مسلح افراد نے درابن پولیس اسٹیشن پر حملے کی کوشش کی، تاہم پولیس کی بھرپور مزاحمت اور جوابی فائرنگ کے بعد حملہ آور اپنا مقصد حاصل کیے بغیر فرار ہوگئے۔

ذرائع کے مطابق تینوں واقعات کے بعد علاقے میں سکیورٹی مزید سخت کردی گئی ہے جبکہ پولیس اور دیگر قانون نافذ کرنے والے ادارے حملہ آوروں کی تلاش اور علاقے کی نگرانی میں مصروف ہیں۔