ڈی آئی خان : درابن تھانے پر حملے کی کوشش ناکام، مسلح حملہ آور فرار

ڈیرہ اسماعیل خان(ڈیلی اردو) خیبرپختونخوا کے شورش زدہ ضلع ڈیرہ اسماعیل خان کی تحصیل درابن میں مسلح افراد نے پولیس تھانے کو نشانہ بنانے کی کوشش کی، تاہم پولیس کی بروقت جوابی کارروائی کے باعث حملہ آور پسپا ہوکر فرار ہوگئے۔

دستیاب اطلاعات کے مطابق مسلح افراد نے درابن پولیس اسٹیشن پر حملے کی کوشش کرتے ہوئے فائرنگ کی، جس پر پولیس اہلکاروں نے فوری جوابی کارروائی کی۔ دونوں جانب سے کچھ دیر فائرنگ کا تبادلہ جاری رہا۔

پولیس کی مؤثر مزاحمت کے نتیجے میں حملہ آور اپنے مقصد میں کامیاب نہ ہوسکے اور علاقے سے فرار ہوگئے۔ واقعے میں کسی جانی یا مالی نقصان کی اطلاع نہیں ملی۔

حملے کے بعد پولیس اور سکیورٹی اہلکاروں نے علاقے میں الرٹ بڑھا دیا جبکہ تھانے اور اطراف کی سکیورٹی مزید سخت کردی گئی ہے۔ حملہ آوروں کی تلاش کے لیے علاقے میں سرچ اور نگرانی کا عمل جاری ہے۔

پولیس کی بروقت کارروائی کے باعث درابن تھانے کو نشانہ بنانے کی کوشش ناکام بنادی گئی۔