شام :وزارت دفاع سے منسوب بھرتی فارم پر مذہبی سوالات، سوشل میڈیا پر شدید بحث

دمشق(ڈیلی اردو) شام میں وزارت دفاع سے منسوب ایک بھرتی فارم میں امیدواروں سے مذہبی نوعیت کی معلومات طلب کیے جانے پر سوشل میڈیا اور مختلف حلقوں میں شدید بحث شروع ہوگئی ہے۔

متداول فارم مبینہ طور پر وزارت دفاع سے وابستہ دفاعی صنعتوں کی ہولڈنگ کمپنی میں انجینئرز، ٹیکنیکل ماہرین اور مختلف شعبوں کے گریجویٹس کی بھرتی کے لیے جاری کیا گیا تھا۔ فارم میں تعلیمی قابلیت، یونیورسٹی کے نمبرز، سابقہ تجربے اور پیشہ ورانہ مہارتوں کے ساتھ بعض مذہبی سوالات بھی شامل تھے۔

رپورٹس کے مطابق امیدواروں سے اس مسجد کا نام پوچھا گیا جہاں وہ جاتے ہیں، ان علما اور مذہبی اساتذہ کے نام طلب کیے گئے جن سے وہ باقاعدگی سے استفادہ کرتے ہیں، جبکہ قرآن پاک کے یاد کیے گئے اجزا کی تعداد بھی دریافت کی گئی۔ فارم میں ’’تزکیہ‘‘ موجود ہونے کی صورت میں اس کی تفصیل دینے کا سوال بھی شامل تھا۔

ان سوالات پر ناقدین نے اعتراض کرتے ہوئے کہا کہ انجینئرنگ اور فنی نوعیت کی ملازمتوں کے لیے پیشہ ورانہ اہلیت، تعلیم اور تجربے کو بنیادی معیار ہونا چاہیے، جبکہ مذہبی وابستگی سے متعلق معلومات طلب کیے جانے سے میرٹ اور مساوی مواقع کے حوالے سے سوالات پیدا ہوتے ہیں۔

’’تزکیہ‘‘ سے متعلق سوال بھی خاص طور پر زیر بحث آیا، کیونکہ فارم میں یہ واضح نہیں تھا کہ اس سے مراد کس نوعیت کی سفارش ہے، اسے کون جاری کرے گا اور آیا بھرتی کے عمل میں اسے کوئی اہمیت دی جائے گی یا نہیں۔

دوسری جانب اس فارم کی سرکاری حیثیت بھی زیر بحث رہی۔ دستیاب رپورٹس کے مطابق متداول اعلان دمشق یونیورسٹی کے ایک انجینئرنگ کالج کے صفحے کے ذریعے سامنے آیا تھا، جبکہ وزارت دفاع کے سرکاری صفحے پر اس کی موجودگی واضح نہیں تھی۔ اسی وجہ سے اس کی مکمل صحت کے بارے میں حتمی رائے قائم کرنے سے پہلے وزارت دفاع یا متعلقہ ادارے کی وضاحت ضروری قرار دی گئی۔

بعد ازاں بعض رپورٹس میں بتایا گیا کہ بھرتی کے فارم میں تبدیلی کرکے متنازع مذہبی سوالات حذف کردیئے گئے، تاہم اس حوالے سے بھی وزارت دفاع کی جانب سے واضح وضاحت سامنے آنے کی اطلاعات نہیں ملیں۔