کوئٹہ : شالکوٹ تھانے پر دستی بم حملہ، پولیس اہلکار اور راہگیر زخمی

کوئٹہ(ڈیلی اردو) بلوچستان کے شورش زدہ دارلحکومت کوئٹہ شہر کے علاقے ہزارگنجی میں نامعلوم حملہ آوروں نے شالکوٹ پولیس اسٹیشن کو دستی بموں سے نشانہ بنایا، جس کے نتیجے میں ایک پولیس اہلکار اور ایک راہگیر زخمی ہوگئے۔

پولیس کے مطابق حملہ آوروں نے تھانے پر تین دستی بم پھینکے، جن کے دھماکوں سے پولیس اہلکار اور وہاں سے گزرنے والا شہری زخمی ہوا۔ واقعے کے فوراً بعد زخمیوں کو طبی امداد کے لیے اسپتال منتقل کردیا گیا۔

حملے کے بعد پولیس اور سکیورٹی فورسز نے علاقے کو گھیرے میں لے کر سکیورٹی مزید سخت کردی۔ حکام نے حملہ آوروں کی تلاش کے لیے سرچ آپریشن شروع کرتے ہوئے جائے وقوعہ سے شواہد بھی اکٹھے کیے۔

پولیس کے مطابق حملے میں ملوث افراد واردات کے بعد فرار ہوگئے، جن کی گرفتاری کے لیے مختلف پہلوؤں سے تحقیقات اور تلاش جاری ہے۔