جنگ بندی مذاکرات منقطع، حماس کا سفارتی وفد استنبول پہنچ گیا

استنبول + دوحہ (ڈیلی اردو/ڈی پی اے) غزہ میں جاری جنگ بندی کی کوششوں کو نئی سمت دینے کے لیے حماس کا اعلیٰ سطحی وفد منگل کے روز قطر کے دارالحکومت دوحہ سے ترکی روانہ ہو گیا۔ حماس کے ایک سینئر اہلکار کے مطابق، وفد کی قیادت تحریک کی قیادت کونسل کے صدر محمد درویش کر رہے ہیں جبکہ مذاکراتی ٹیم کے سربراہ خلیل الحیہ بھی وفد کا حصہ ہیں۔

حماس ذرائع کے مطابق، وفد استنبول میں ترک حکام سے جنگ بندی مذاکرات میں حالیہ تعطل کے بعد کی صورتحال پر تفصیلی بات چیت کرے گا۔ واضح رہے کہ گزشتہ دو ہفتوں سے قطر میں اسرائیل اور حماس کے درمیان بالواسطہ مذاکرات جاری تھے جن کا مقصد جنگ بندی اور یرغمالیوں کی رہائی تھا، تاہم یہ عمل گزشتہ ہفتے اچانک رک گیا۔

ذرائع کا کہنا ہے کہ ترک حکام کے ساتھ ملاقاتوں میں حماس وفد اس تعطل کے اسباب اور ممکنہ حل پر غور کرے گا۔ ادھر، امریکہ نے بھی گزشتہ ہفتے اپنے نمائندے کو دوحہ سے واپس بلا لیا تھا۔ خصوصی امریکی مندوب اسٹیو وٹکوف نے حماس کو فائر بندی میں ناکامی کا ذمہ دار ٹھہراتے ہوئے کہا تھا کہ واشنگٹن اب "متبادل آپشنز" پر غور کرے گا۔

دوسری جانب، حماس کے سیاسی بازو کے رکن باسم نعیم کے مطابق حالیہ مذاکرات میں غزہ سے اسرائیلی فوج کے انخلا کی تفصیلات زیرِ غور تھیں۔

اقوام متحدہ کے حمایت یافتہ ماہرین نے منگل کو خبردار کیا ہے کہ غزہ شدید قحط کی زد میں ہے، جبکہ اسرائیل بین الاقوامی دباؤ کے باوجود جنگ بندی پر رضامندی سے انکاری ہے۔