خضدار میں سیکیورٹی فورسز کا آپریشن، 4 دہشت گرد ہلاک، بارودی مواد سے بھری 2 گاڑیاں تباہ

راولپنڈی (نمائندہ ڈیلی اردو) پاکستان کے شورش زدہ صوبہ بلوچستان کے ضلع خضدار میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے چار دہشت گردوں کو ہلاک کر دیا، جبکہ بارودی مواد سے بھری دو گاڑیوں کو بھی تباہ کر دیا۔

پاک فوج کے شعبہ تعلقات عامہ (آئی ایس پی آر) کے مطابق آپریشن دہشت گردوں کی موجودگی کی اطلاع پر کیا گیا۔ بیان میں کہا گیا کہ کارروائی کے دوران سیکیورٹی فورسز نے دہشت گردوں کے زیر استعمال بارودی مواد سے بھری دو گاڑیوں کا بروقت سراغ لگایا۔

آئی ایس پی آر کے مطابق فورسز نے فوری اور مؤثر کارروائی کرتے ہوئے دونوں گاڑیوں کو کامیابی سے تباہ کر دیا، جس کے نتیجے میں انہیں آپریٹ کرنے والے چار دہشت گرد ہلاک ہو گئے۔

بیان میں کہا گیا کہ پاکستان، کالعدم بلوچ لبریشن آرمی (بی ایل اے) سے تعلق رکھنے والے دہشت گردوں کے لیے "فتنہ الہندوستان" کی اصطلاح استعمال کرتا ہے۔ آئی ایس پی آر نے دعویٰ کیا کہ ہلاک ہونے والے دہشت گرد بھارت کی سرپرستی میں سرگرم تھے۔

آئی ایس پی آر کے مطابق علاقے میں دیگر ممکنہ دہشت گردوں کی موجودگی کے پیش نظر کلیئرنس اور سرچ آپریشن جاری ہے، جبکہ سیکیورٹی فورسز بلوچستان میں دہشت گردی کے خاتمے کے لیے کارروائیاں جاری رکھیں گی۔