خوست کی فضاؤں میں ڈرونز پر طالبان کی فائرنگ، شہریوں میں خوف و ہراس

کابل(ڈیلی اردو)افغانستان کے صوبہ خوست میں فضا میں پرواز کرنے والے نامعلوم ڈرونز پر طالبان جنگجوؤں کی جانب سے فائرنگ کیے جانے کی اطلاعات سامنے آئی ہیں، جس کے باعث بعض علاقوں میں شہریوں میں خوف و تشویش پھیل گئی۔

ذرائع نے افغان میڈیا کو بتایا کہ جمعہ کی شام خوست شہر اور سراباغ کے علاقوں میں ڈرونز کی موجودگی کے دوران طالبان جنگجوؤں نے ان کی جانب مسلسل فائرنگ کی۔ ذرائع کے مطابق فائرنگ کافی دیر تک جاری رہی اور بعض مقامات پر گولیاں چلنے کی آوازیں واضح طور پر سنی گئیں۔

ذرائع کا کہنا ہے کہ فائرنگ کے باوجود ڈرونز نے خوست کی فضاؤں میں پرواز جاری رکھی اور انہیں مار گرائے جانے کی کوئی اطلاع سامنے نہیں آئی۔ مسلسل فائرنگ کے باعث مقامی آبادی میں خوف و ہراس پیدا ہوا، تاہم فائرنگ سے کسی جانی نقصان کی اطلاع نہیں ملی۔

رپورٹ کے مطابق حالیہ مہینوں کے دوران خوست سمیت افغانستان کے مختلف صوبوں کی فضاؤں میں ڈرونز کی پروازوں سے متعلق متعدد اطلاعات سامنے آتی رہی ہیں۔ تاہم ان ڈرونز کی ملکیت، آپریشن کے مقصد اور خوست میں ان کی موجودگی کی وجوہات کے بارے میں تاحال واضح معلومات سامنے نہیں آسکیں۔