خیبرپختونخوا: دیر بالا میں تحریک طالبان پاکستان کا انتہائی مطلوب دہشت گرد ہلاک

پشاور (بیورو رپورٹ) کاؤنٹر ٹیررازم ڈیپارٹمنٹ کی خیبرپختونخوا کے ضلع دیر بالا میں کارروائی کے دوران کالعدم ٹی ٹی پی کا انتہائی مطلوب دہشت گرد ہلاک ہو گیا۔

تفصیلات کے مطابق کاؤنٹر ٹیررازم ڈیپارٹمنٹ (سی ٹی ڈی) ملاکنڈ ڈویژن نے دیر بالا کے علاقے اخگرام واڑئی میں اہم کارروائی کی، جس میں کالعدم تنظیم تحریک طالبان پاکستان (ٹی ٹی پی) کا انتہائی مطلوب دہشت گرد عبدالوہاب ہلاک ہوگیا، ہلاک دہشت گرد سے اسلحہ اور دستی بم برآمد ہوا۔

سی ٹی ڈی کے مطابق ہلاک دہشت گرد عبدالوہاب پولیس پوسٹ کشورہ مالم جبہ، مالم جبہ ریزارٹ، گرلز مڈل اسکول کشورہ کو تباہ کرنے کے علاوہ پولیس اہلکاروں کے قتل، بم دھماکوں اور پاک فوج کے دستوں پر خودکش حملوں میں بھی ملوث تھا۔

ترجمان سی ٹی ڈی کا کہنا ہے کہ ہلاک دہشت گرد کی گرفتاری پر حکومت نے 5 لاکھ روپے انعام مقرر کی تھی۔