خیبر اور ڈیرہ اسماعیل خان میں سکیورٹی فورسز کے آپریشن میں 2 دہشت گرد ہلاک

راولپنڈی (ک م) صوبہ خیبرپختونخوا میں 2 مقامات پر سکیورٹی فورسز کے آپریشن میں 2 دہشت گرد ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق قبائلی ضلع خیبر میں پہلے آپریشن میں شمروز عرف شانے مارا گیا جبکہ ضلع ڈیرہ اسماعیل خان میں کیے گئے دوسرے آپریشن کے دوران دہشت گرد منصور ہلاک ہوا۔

آئی ایس پی آر کا کہنا ہے کہ ہلاک دہشت گردوں سے ہتھیار، گولیاں، دھماکا خیز مواد برآمد کرلیا گیا ہے، مزید دہشت گردوں کی مبینہ موجودگی پر کلیئرنس آپریشن جاری ہے۔

آئی ایس پی آر کے مطابق دہشت گرد فورسز پر حملوں اور شہریوں کے ہلاکت میں ملوث تھے۔

پاکستانی فوج کے شعبہ تعلقات عامہ کے مطابق علاقہ مکینوں نے کارروائی کو سراہا اور دہشت گردی کے خاتمے کیلئے بھرپور تعاون کا اظہار کیا ہے۔