خیبر پختونخوا میں ایک دن کے دوران دہشت گردی کے چار واقعات

اسلام آباد (ڈیلی اردو مانیٹرنگ سیل) پاکستان کے صوبے خیبر پختونخوا کے میں چار مختلف دہشت گردانہ حملوں میں ایک اہلکار ہلاک اور متعدد زخمی ہوگئے۔

لکی مروت دھماکا

تفصیلات کے مطابق لکی مروت میں پولیس گاڑی پر آئی ای ڈی دھماکہ ہوا جس میں 2 پولیس اہلکار زخمی ہو گئے۔

پولیس کے مطابق واقعہ قیمت منجیوالا کے قریب پیش آیا جہاں پولیس کی گاڑی پر شدت پسندوں نے آئی ای ڈی دھماکہ کیا گیا جس میں 2 پولیس اہلکار زخمی ہو گئے۔

پولیس کے مطابق پولیس کی دو گاڑیاں لکی مروت کی جانب سے میرعالم منجیوالا جائے وقوعہ جا رہی تھی کہ پچھلی گاڑی دھماکے کی زد میں آگئی۔

دھماکے کے بعد پولیس اور شدت پسندوں کے درمیان فائرنگ کا تبادلہ بھی ہوا۔

شمالی وزیرستان میں دھماکا

قبائلی شمالی وزیرستان کی تحصیل دتہ خیل میں دستی بم دھماکے سے سیکورٹی فورسز کا سپاہی عبدالستار ہلاک ہوگیا۔

بنوں فائرنگ

ادھر بنوں میں نامعلوم افراد کی فائرنگ سے ویلج کونسل چیئرمین شدید زخمی ہوگیا۔

پولیس کے مطابق واقعہ بنوں میں کوہاٹ روڈ پر پیش آیا جہاں نامعلوم افراد نے فائرنگ کرکے ویلج کونسل بیزن خیل کے چیئرمین صفیان وزیر کو شدید زخمی کردیا۔

زخمی کو خلیفہ گلنواز ہسپتال منتقل کیا گیا جبکہ ملزمان فرار ہونے میں کامیاب ہو گئے۔

پولیس نے واقعے کا مقدمہ درج کرکے ملزمان کی تلاش شروع کردی۔

ڈیرہ اسماعیل خان شدت پسند گاڑی چھین کر فرار

ادھر ڈیرہ اسماعیل خان میں کالعدم تنظیم ٹی ٹی پی کے شدت پسندوں نے پی ٹی سی ایل ملازمین سے گاڑی چھین کر فرار ہوگئے۔

پولیس کے مطابق تھانہ کلاچی کے حدود میں پی ٹی سی ایل کی گاڑی شدت پسند چھین کر نامعلوم مقام پر چلے گئے۔