خیبر پختونخوا میں سکیورٹی فورسز پر حملے، دھماکے اور جھڑپیں؛ پولیس اہلکار سمیت متعدد افراد ہلاک و زخمی، تین چوکیدار اغوا

پشاور (ڈیلی اردو رپورٹ) پاکستان کے شورش زدہ صوبہ خیبر پختونخوا کے مختلف اضلاع میں گزشتہ 24 گھنٹوں کے دوران دھماکوں، مسلح حملوں، جھڑپوں اور اغوا کے متعدد واقعات میں ایک پولیس اہلکار ہلاک جبکہ متعدد سکیورٹی اہلکاروں سمیت کم از کم 27 افراد زخمی ہوگئے ہیں۔ مختلف واقعات میں دو مسلح دہشت گردوں کے ہلاک ہونے اور تین چوکیداروں کے اغوا کی بھی اطلاعات سامنے آئی ہیں۔

صوبائی دارالحکومت پشاور کے علاقے چمکنی میں پولیس چوکی کے قریب بارودی مواد کے دھماکے میں ڈیوٹی پر موجود دو پولیس اہلکاروں سمیت سات افراد زخمی ہوگئے۔
ریسکیو 1122 کے مطابق ترناب فارم پولیس چوکی کے قریب نامعلوم مسلح افراد کی جانب سے بارودی مواد پھینکے جانے کے بعد دھماکہ ہوا۔ دھماکے کے نتیجے میں چوکی کے قریب موجود دو پولیس اہلکاروں سمیت سات افراد زخمی ہوئے۔

ریسکیو اہلکاروں نے زخمیوں کو موقع پر ابتدائی طبی امداد فراہم کی، جس کے بعد انہیں مزید علاج کے لیے ہسپتال منتقل کردیا گیا۔ حکام کی جانب سے دھماکے کی نوعیت اور اس میں استعمال ہونے والے بارودی مواد سے متعلق مزید تحقیقات کی جا رہی ہیں۔

ڈیرہ اسماعیل خان، وزیرستان روٹ پر فورسز کے کانوائے پر مبینہ ڈرون حملہ
ادھر ڈیرہ اسماعیل خان سے وزیرستان کی جانب جانے والے سکیورٹی فورسز کے کانوائے پر مبینہ کواڈ کاپٹر حملے کے نتیجے میں تقریباً 20 اہلکاروں کے زخمی ہونے کی اطلاعات ہیں۔
ابتدائی اطلاعات کے مطابق زخمیوں میں پاک فوج کے پانچ جبکہ فرنٹیئر کور کے 14 اہلکار شامل ہیں، تاہم ایک اہلکار کی شناخت اور یونٹ سے متعلق تفصیلات کی مزید تصدیق ہونا باقی ہے۔
ذرائع کے مطابق فورسز کا کانوائے معمول کی نقل و حرکت کے دوران مبینہ ڈرون حملے کا نشانہ بنا، جس کے بعد زخمی اہلکاروں کو طبی امداد کے لیے منتقل کیا گیا۔
واقعے کے بعد علاقے میں سکیورٹی مزید سخت کردی گئی جبکہ متعلقہ اداروں کی جانب سے حملے کی نوعیت، ڈرون کی سمت اور اس میں ملوث عناصر کے حوالے سے تحقیقات شروع کیے جانے کی اطلاعات ہیں۔

ابتدائی طور پر سامنے آنے والی فہرست کے مطابق زخمی اہلکاروں میں ہدایت اللہ، لانس نائیک انور، اسماعیل، سپاہی خوشحال، صوبیدار شبیر، سپاہی امداد اللہ، سپاہی ناہید، لانس نائیک محمد شاہد، صوبیدار جہانگیر، صوبیدار عابد علی، لانس نائیک جابر، لانس نائیک اصغر، لانس نائیک محمد وقاص، لانس نائیک صفت اللہ، لانس نائیک آصف، حوالدار محمد حسن، سپاہی جمشید، سپاہی فاروق، مصور اور نائیک حیدر علی شامل ہیں۔

تاہم زخمی اہلکاروں کی تعداد، شناخت اور واقعے کی مکمل نوعیت سے متعلق حتمی معلومات متعلقہ حکام کی باضابطہ تصدیق کے بعد ہی سامنے آسکیں گی۔
 

جنوبی وزیرستان میں پولیس اہلکار ہلاک، ایک شخص زخمی

قبائلی ضلع جنوبی وزیرستان اپر میں بھی نامعلوم مسلح افراد نے ایک گاڑی کو دستی بم سے نشانہ بنانے کے بعد فائرنگ کی۔
ذرائع کے مطابق حملے کے نتیجے میں پولیس اہلکار عبداللہ ہلاک ہوگئے جبکہ موسیٰ خان عرف موسک زخمی ہوئے۔
واقعے کے بعد سکیورٹی اہلکاروں نے علاقے میں کارروائی شروع کردی، تاہم حملے میں ملوث افراد کی شناخت اور گرفتاری سے متعلق فوری طور پر مزید معلومات سامنے نہیں آسکیں۔

بنوں میں کارروائی، دو مسلح افراد ہلاک
ضلع بنوں میں سکیورٹی فورسز نے مسلح افراد کی موجودگی کی اطلاع پر کارروائی کرتے ہوئے دو دہشت گردوں کو ہلاک کرنے کا دعویٰ کیا ہے۔
ذرائع کے مطابق سکیورٹی فورسز نے خفیہ اطلاعات کی بنیاد پر علاقے میں کارروائی کی۔ اس دوران فورسز اور مسلح افراد کے درمیان فائرنگ کا تبادلہ ہوا، جس کے نتیجے میں دو مسلح افراد ہلاک ہوگئے۔
کارروائی کے بعد علاقے کی تلاشی کے دوران ہلاک افراد کے قبضے سے بھاری مقدار میں اسلحہ، گولہ بارود اور دیگر سامان برآمد کیے جانے کی اطلاعات ہیں۔
تاہم ہلاک افراد کی شناخت اور ان کے کسی عسکریت پسند تنظیم سے وابستگی کے بارے میں آزاد ذرائع سے فوری طور پر تصدیق نہیں ہوسکی۔

خیبر میں جبہ ڈیم سے تین چوکیدار مبینہ طور پر اغوا
قبائلی ضلع خیبر کے علاقے جمرود میں جبہ ڈیم کے تعمیراتی منصوبے کی نگرانی اور سامان کی حفاظت پر مامور تین چوکیداروں کو نامعلوم مسلح افراد نے مبینہ طور پر اغوا کرلیا۔
ذرائع کے مطابق واقعہ 25 اگست کی شب پیش آیا، جب مسلح افراد نے جبہ ڈیم کے مقام پر موجود چوکیداروں کو اسلحے کے زور پر اپنے قبضے میں لیا اور انہیں اپنے ساتھ لے گئے۔
مغویوں کی شناخت ممتاز ولد سیپور، مینا گل ولد خیوا گل اور سدیاس ولد نور وزیر کے نام سے ہوئی ہے۔ ذرائع کے مطابق تینوں افراد کا تعلق اسماعیل خیل قبیلے سے ہے۔
واقعے کی اطلاع ملنے کے بعد علاقے میں تشویش پائی جاتی ہے جبکہ مغوی چوکیداروں کی بازیابی کے لیے متعلقہ اداروں کی جانب سے اقدامات شروع کیے جانے کی اطلاعات ہیں۔
حکام کی جانب سے اغوا کے محرکات اور مسلح افراد کی شناخت کے حوالے سے بھی تحقیقات جاری ہیں۔

ٹانک میں تھانہ گمل پر مسلح حملہ
ضلع ٹانک کے علاقے میں دہشت گردوں نے تھانہ گمل پر سنائپر رائفلز اور دیگر بھاری ہتھیاروں سے حملہ کیا، تاہم پولیس اور فرنٹیئر کور کے اہلکاروں کی بروقت جوابی کارروائی کے بعد حملہ آور فرار ہوگئے۔
پولیس ذرائع کے مطابق حملے کے وقت تھانہ گمل میں پولیس اہلکاروں کے ساتھ فرنٹیئر کور کے 221 ونگ کے اہلکار بھی موجود تھے۔
ذرائع کے مطابق مسلح افراد نے اچانک پولیس اسٹیشن پر فائرنگ شروع کی، جس پر پولیس اور ایف سی اہلکاروں نے فوری طور پر جوابی کارروائی کی۔
سکیورٹی اہلکاروں کی مؤثر مزاحمت اور مسلسل جوابی فائرنگ کے باعث حملہ آور مزید کارروائی کیے بغیر وہاں سے فرار ہوگئے۔
پولیس اور دیگر سکیورٹی اداروں نے حملہ آوروں کی تلاش کے لیے علاقے میں سرچ آپریشن شروع کردیا ہے۔

خیبر پختونخوا کے مختلف اضلاع میں سامنے آنے والے ان واقعات کے بعد سکیورٹی اقدامات مزید سخت کیے گئے ہیں، جبکہ متعلقہ ادارے حملوں میں ملوث عناصر کی شناخت اور انہیں گرفتار کرنے کے لیے کارروائیاں جاری رکھے ہوئے ہیں۔ تاہم متعدد واقعات کی ذمہ داری کالعدم تحریک طالبان ہاکستان نے قبول کرنے کا دعوی کیا ہے۔