خیبر پختونخوا میں عسکریت پسندوں کے حملے، ایک پولیس اہلکار ہلاک، تین زخمی

اسلام آباد (نمائندگان ڈیلی اردو) پاکستان کے شورش زدہ صوبے خیبرپختونخوا کے اضلاع ڈیرہ اسماعیل خان، ہنگو اور بنوں میں عسکریت پسندوں نے پولیس پر حملے کیے، جن میں ایک اہلکار ہلاک اور تین زخمی ہوئے ہیں۔

ڈیرہ اسماعیل خان کے علاقے میریائی میں عسکریت پسندوں کی فائرنگ سے پولیس ہیڈ کانسٹیبل اکرام اللہ گنڈا پور ہلاک ہو گئے۔ واقعے کے بعد پولیس کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کر دیا۔ 

پولیس کے مطابق ملزمان کی تلاش اور واقعے کی تفتیش جاری ہے۔

ہنگو میں عسکریت پسندوں نے پولیس کی گاڑی پر حملہ کیا، جس میں ایک اہلکار زخمی ہوا۔ 

ضلعی پولیس آفیسر خان زیب مہمند نے بتایا کہ تھانہ صدر کی حدود میں عسکریت پسندوں نے پولیس وین پر فائرنگ کی۔ زخمی کانسٹیبل کو طبی امداد کے لیے ڈی ایچ کیو اسپتال منتقل کر دیا گیا۔ 

انہوں نے کہا کہ عسکریت پسندوں کی تلاش کے لیے آپریشن شروع کر دیا گیا ہے اور داخلی و خارجی راستوں پر ناکے سخت کر دیے گئے ہیں۔

ادھر بنوں میں میراخیل پولیس پر عسکریت پسندوں نے فائرنگ کی، جس میں پولیس گاڑی میں موجود ایس ایچ او واجد خان محفوظ رہے جبکہ ایک اہلکار زخمی ہوا۔ زخمی اہلکار کو فوری طور پر ہسپتال منتقل کیا گیا۔ حملہ کرنے والے موٹر سائیکل سوار عسکریت پسند موقع سے فرار ہو گئے۔