خیبر پختونخوا: کرم میں ایف سی اہلکاروں پر فائرنگ، 2 اہلکار ہلاک، 2 زخمی

پشاور (ڈیلی اردو/ٹی این این/بی بی سی) صوبہ خیبر پختونخوا کے قبائلی ضلع کرم کی تحصیل لوئر کرم کے علاقے چار خیل میں ایف سی اہلکاروں پر فائرنگ کے نتیجے میں دو ایف سی اہلکار ہلاک ہوگئے

پولیس کے مطابق لوئر کرم کے علاقے چارخیل میں دہشت گردوں نے سیکورٹی پر مامور ایف سی اہلکاروں پر فائرنگ کی جس میں ٹل اسکاوٹس کے دو اہلکار توصیف مہمند اور کامران موقع پر ہی ہلاک ہوگئے، جبکہ ایک زخمی کا علاج جاری ہے۔

حکام کے مطابق جائے وقوع پر سیکیورٹی کی بھاری نفری پہنچ گئی ہے اور اس واقع کی تحقیقات جاری ہے۔

کرم میں 12 اکتوبر کو اپر کرم کے علاقے کونج علیزئی میں ہوئے مسافر ویگن قافلے پر حملے کے نتیجے میں متعدد افراد کی ہلاکت کے بعد سے پاڑہ چنار، پشاور روڈ ہر قسم کی آمد و رفت کے لیے بند ہے اور مقامی افراد کے مطابق علاقے میں کھانے پینے کی اشیا، تیل اور ادویات کی قلت کے خدشات جنم لے رہے ہیں۔

یاد رہے کہ اس مسافر ویگن قافلے پر ہونے والے حملے کے نتیجے میں سنی مسلک سے تعلق رکھنے والے 15 افراد ہلاک ہوئے ہوئے تھے۔

کوہاٹ کی ضلعی انتظامیہ کے مطابق پیر کے روز سڑک کھلوانے کی کوشش کے لیے بم ڈسپوزل سکواڈ کی مدد بھی حاصل کی گئی کہ اسی دوران شدت پسندوں کی جانب سے سیکورٹی اہلکاروں پر حملہ کر دیا گیا جس کے نتیجے میں دو ایف سی اہلکاروں کی ہلاکت ہوئی۔