خیبر: پولیس کی کارروائی، ٹی ٹی پی کا مطلوب کمانڈر سیف اللہ مارا گیا؛ دو اہلکار زخمی

پشاور (ڈیلی اردو) پاکستان کے صوبہ خیبر پختونخوا کے ضلع خیبر کی تحصیل باڑہ کے علاقے شیخان میں پولیس نے خفیہ اطلاع پر کارروائی کرتے ہوئے کالعدم تحریک طالبان پاکستان (ٹی ٹی پی) سے وابستہ ایک مطلوب کمانڈر سیف اللہ کو ہلاک کردیا، جبکہ فائرنگ کے تبادلے اور دستی بم حملے کے دوران دو پولیس اہلکار معمولی زخمی ہوگئے۔

پولیس حکام کے مطابق سیف اللہ پولیس اور محکمہ انسداد دہشتگردی (سی ٹی ڈی) کو متعدد سنگین مقدمات میں مطلوب تھا اور اسے اشتہاری قرار دیا گیا تھا۔ سی ٹی ڈی ریکارڈ کے مطابق وہ میدانک کے علاقے میں سکیورٹی چیک پوسٹوں پر حملوں اور جمرود کے علاقے علی مسجد میں دیسی ساختہ بم دھماکوں میں مبینہ طور پر ملوث تھا۔

حکام کا کہنا ہے کہ سیف اللہ گزشتہ تین برس سے افغانستان میں مقیم تھا اور حال ہی میں ایک دہشتگرد گروہ کی کمان سنبھال کر پاکستان واپس آیا تھا، جہاں اس کا مقصد دہشتگردانہ کارروائیاں کرنا تھا۔ کارروائی کے دوران اس نے پولیس اہلکاروں پر دستی بم پھینکا، جس کے نتیجے میں دو اہلکار معمولی زخمی ہوئے۔ زخمیوں کو فوری طبی امداد فراہم کی گئی۔

انسپکٹر جنرل پولیس خیبر پختونخوا ذوالفقار حمید نے کارروائی میں حصہ لینے والے اہلکاروں کی کارکردگی کو سراہتے ہوئے کہا کہ مطلوب دہشتگرد کمانڈر کے خلاف کامیاب کارروائی سے ممکنہ طور پر سینکڑوں بے گناہ شہریوں کی جانیں محفوظ ہوئی ہیں۔ ان کا کہنا تھا کہ صوبے سے دہشتگردی کے مکمل خاتمے تک پولیس کی کارروائیاں جاری رہیں گی۔