دہشتگردی مقدمات کے گواہوں کا تحفظ، خیبرپختونخوا کابینہ کا اہم فیصلہ

پشاور(ڈیلی اردو) وزیراعلیٰ خیبرپختونخوا سہیل آفریدی کی زیر صدارت صوبائی کابینہ کے اجلاس میں دہشتگردی سمیت حساس فوجداری مقدمات کے گواہوں کے تحفظ کے لیے ادارہ جاتی نظام قائم کرنے کی منظوری دے دی گئی۔

وزیر اطلاعات خیبرپختونخوا شفیع جان کے مطابق کابینہ نے خیبرپختونخوا وٹنس پروٹیکشن ایکٹ 2021 کے تحت وٹنس پروٹیکشن بورڈ کے قیام کی منظوری دی ہے، جبکہ بورڈ کے ماتحت دو یونٹس بھی قائم کیے جائیں گے۔

انہوں نے بتایا کہ بورڈ گواہوں کے تحفظ سے متعلق پالیسی اور رہنما اصول مرتب کرنے، ان پر عملدرآمد کی نگرانی اور ماتحت یونٹس کی کارکردگی کا جائزہ لینے کا ذمہ دار ہوگا۔

صوبائی حکومت کے مطابق وٹنس پروٹیکشن ایکٹ کا بنیادی مقصد حساس نوعیت کے فوجداری مقدمات، بالخصوص دہشتگردی کے مقدمات میں گواہی دینے والے افراد اور دیگر متعلقہ اشخاص کو تحفظ فراہم کرنا ہے۔

وزیر اطلاعات کے مطابق ایکٹ کی دفعات 3 اور 5 اور متعلقہ قواعد کے تحت بورڈ کے ساتھ یونٹ اول اور یونٹ دوم کا قیام بھی ضروری تھا، جس کی منظوری اب صوبائی کابینہ نے دے دی ہے۔

اجلاس میں گاڑیوں کی رجسٹریشن سے متعلق بھی فیصلہ کیا گیا۔ کابینہ نے موٹر وہیکلز آرڈیننس 1965 کے تحت رجسٹریشن دستاویزات کی چھپائی اور فراہمی کے لیے نئے حکومتی سطح کے معاہدے اور نظرثانی شدہ نرخوں کی منظوری دی۔

کابینہ نے معمولی جرائم میں سزا پانے والے قیدیوں کے لیے دو ماہ کی خصوصی سزا معافی کی بھی منظوری دی۔ حکام کے مطابق اس فیصلے پر قواعد و ضوابط اور سابقہ طریقہ کار کے مطابق باقاعدہ نوٹیفکیشن جاری کیا جائے گا۔

اجلاس میں گلیات سے مری کو پانی کی فراہمی کے معاملے پر بھی غور کیا گیا۔ پانی کی تقسیم، نرخوں، واجبات اور فراہمی کی مقدار سے متعلق معاملہ آئندہ اجلاس میں مشترکہ مفادات کونسل کے سامنے رکھنے کی منظوری دی گئی۔

اس کے علاوہ صوبائی محتسب کے دفتر کی سال 2025 کی سالانہ کارکردگی رپورٹ بھی کابینہ کے سامنے پیش کی گئی، جسے خیبرپختونخوا اسمبلی میں پیش کرنے کی منظوری دے دی گئی۔