سری لنکا: گھر پر دستی بم حملہ، دو کمسن بھائی ہلاک، والد سمیت تین زخمی

کولمبو (ڈیلی اردو) سری لنکا کے دارالحکومت کولمبو کے مغربی صوبے میں ایک گھر کو دستی بم سے نشانہ بنائے جانے کے نتیجے میں دو کمسن بھائی ہلاک جبکہ ان کے والد اور دو دیگر بچے شدید زخمی ہوگئے۔

پولیس کے مطابق واقعہ ڈیہی والا ماؤنٹ لاوینیا کے علاقے کاوڈان میں سری سنگابو روڈ پر واقع ایک گھر میں پیش آیا، جہاں صبح کے وقت نامعلوم افراد نے دستی بم پھینکا۔

حملے کے نتیجے میں گھر میں موجود 10 اور 14 سالہ دو بھائی شدید زخمی ہوئے۔ 10 سالہ بچے کو کالبووِلا ٹیچنگ اسپتال منتقل کیا گیا، تاہم وہ کچھ دیر بعد زخموں کی تاب نہ لاتے ہوئے ہلاک ہوگیا، جبکہ اس کا 14 سالہ بھائی بھی دورانِ علاج دم توڑ گیا۔

پولیس کے مطابق حملے میں بچوں کا 52 سالہ والد اور دو دیگر بچے بھی شدید زخمی ہوئے، جنہیں طبی امداد کے لیے اسپتال منتقل کرکے داخل کرلیا گیا ہے۔

حکام کے مطابق دستی بم حملے کے محرکات اور اس کے پیچھے موجود افراد کے بارے میں فوری طور پر کوئی حتمی معلومات سامنے نہیں آسکیں۔ پولیس نے واقعے کی تحقیقات شروع کردی ہیں اور حملہ آوروں کی شناخت سمیت مختلف پہلوؤں کا جائزہ لیا جا رہا ہے۔