سعودی آئل تنصیبات پر حوثی ملیشیا کے ڈرون حملے

ریاض (ڈیلی اردو/ڈوئچے ویلے/اے ایف پی/روئٹرز) یمن کی حوثی ملیشیا کا کہنا ہے کہ انہوں نے سعودی عرب کی تیل تنصیبات پر ڈرون حملے کیے ہیں۔

ان حملوں کا اعلان حوثی ملیشیا کے ٹیلی وژن نیٹ ورک المصیرہ سے کیا گیا۔ حوثی ملیشیا کے ترجمان یحییٰ سری نے المصیرہ ٹیلی وژن پر ایک بیان میں بتایا کہ سعودی عرب پر حملے اتوار اور پیر کی درمیانی رات میں کیے گئے۔

ترجمان نے بتایا کہ حملوں کے اہداف میں آرامکو ریفائنری اور جبیل کے علاوہ خمیس مشیط اور جازان کے حساس سکیورٹی مقامات شامل تھے۔ ان حملوں کے لیے پانچ ڈرونز اور دو بیلسٹک میزائلوں کا استعمال کیا گیا۔

یمن کی ایران نواز حوثی ملیشیا کو سعودی عرب کی قیادت میں قائم فوجی اتحاد کے حملوں کا سامنا ہے۔

سعودی حکام کے مطابق اتوار کو خمیس مشیط اور جازان پر کیے گئے ڈرون حملوں کو سعودی دفاعی سکیورٹی نے فضا ہی میں تباہ کر دیا تھا۔

آرامکو پہلے بھی نشانے پر

حوثی ملیشیا پہلے بھی سعودی عرب کی انتہائی بڑی آئل ریفائنری کو نشانہ بنا چکی ہے۔ مغربی شہر جدہ کے نواح میں قائم یہ ریفائنری سعودی عرب کا ایک انتہائی اہم اسٹریٹیجک اثاثہ خیال کیا جاتا ہے۔

اُس حملے میں ریفائنری کے ٹینک کو شدید نقصان پہنچا تھا۔ حملے کے بعد دھماکے سے آگ بھی بھڑک اٹھی تھی اور کئی دنوں کے بعد مرمت کا مکمل ہوا تھا۔

مارب کی لڑائی

ادھر یمن کے علاقے مارب میں حوثی ملیشیا اور منصور ہادی حکومت کی حامی افواج میں جھڑپوں کا سلسلہ جاری ہے۔ ان جھڑپوں میں کم از کم ستر افراد کی ہلاکت کا بتایا گیا ہے۔

ایران نواز ملیشیا تیل کی دولت سے مالا مال علاقے پر قبضے کی کوشش میں ہے۔ منصور ہادی کی حکومت کو سعودی عرب اور بین الاقوامی برادری کی حمایت حاصل ہے۔