سکیورٹی فورسز کی خیبر اور بنوں میں کارروائیاں، 13 دہشت گرد ہلاک

راولپنڈی (ک م) پاکستانی سکیورٹی فورسز نے شورش زدہ صوبے خیبر پختونخوا میں دو مختلف کارروائیاں کرتے ہوئے 13 دہشت گردوں کو ہلاک کر دیا۔

پاکستانی فوج کے شعبہ تعلقات عامہ آئی ایس پی آرکے مطابق سیکیورٹی فورسز نے خیبر کے علاقے باڑہ اور بنوں کے علاقوں میں کارروائیاں کی، باڑہ میں انٹیلی جنس بیسڈ آپریشن میں 10 دہشت گرد ہلاک ہوئے جبکہ ضلع بنوں میں آپریشن کے دوران 3 دہشت گرد مارے گئے۔

آئی ایس پی آر کا کہنا ہے کہ علاقے میں خوارج کے خاتمے کیلئے کلیئرنس آپریشنز جاری ہیں۔

وزیراعظم شہباز شریف نے خیبرپختونخوا میں 13 خوارج کو ہلاک کرنے پر سکیورٹی فورسز کو خراج تحسین کیا اور کہا کہ سیکیورٹی فورسز نے پیشہ ورانہ مہارت سے بنوں اور خیبر میں دہشتگردوں کو ہلاک کیا، سکیورٹی فورسز دہشتگردی کے خلاف سیسہ پلائی دیوار کی مانند ہیں۔