سیکیورٹی فورسز کا خیبر کے علاقے وادی تیراہ میں آپریشن، داعش کا اہم کمانڈر ہلاک

راولپنڈی (ک م) سیکیورٹی فورسز نے صوبہ خیبر پختونخوا کے قبائلی ضلع خیبر کی دور افتادہ وادی تیراہ کے علاقے جبر میلہ میں آپریشن کے دوران داعش کے کمانڈر کو ہلاک کردیا۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیاہے کہ آپریشن ہائی پروفائل دہشت گرد کی موجودگی کی اطلاع پر آپریشن کیا گیا۔

ترجمان پاک فوج نے بتایا کہ دوران آپریشن داعش سے تعلق رکھنے والے دہشت گرد سورت گل عرف سیف اللہ کو ہلاک کر دیا گیا۔

آئی ایس پی آر نے بتایا کہ مارے گئے دہشت گرد کمانڈر سے اسلحہ، گولہ بارود اور دھماکا خیز مواد بھی برآمد کیا گیا ہے جب کہ علاقے میں دہشت گردی کے خاتمے تک آپریشن جاری رہے گا۔

خیبر کی وادی تیراہ کی سرحدیں دو دیگر قبائلی علاقوں کرم اور اورکزئی سے بھی ملتی ہیں اور تقریباً 100 کلومیٹر پر پھیلی اس وادی کا بیشتر حصہ جنگلات سے ڈھکا ہوا ہے جہاں کالعدم شدت پسند تنظیموں نے اپنی پناہ گاہیں قائم کر رکھی ہیں۔

تین قبائلی علاقوں کے سنگم پر واقع یہ وادی عسکری اعتبار سے بھی انتہائی اہمیت کی حامل ہے کیوں کہ دیگر قبائلی علاقوں میں تعینات اہلکاروں کو رسد کی ترسیل کے لیے جو راستہ استعمال کیا جاتا ہے وہ تیراہ ہی سے ہو کر گزرتا ہے۔