سی ٹی ڈی کی کراچی میں بڑی کارروائی، تحریک طالبان پاکستان کا اہم کمانڈر گرفتار

کراچی (نمائندہ ڈیلی اردو) کراچی کے علاقے پی آئی بی کالونی کے قریب سی ٹی ڈی نے کارروائی کرتے ہوئے کالعدم تحریک طالبان پاکستان کے مطلوب دہشت گرد اور بونیر کے کمانڈر کو گرفتار کر لیا۔

سرکاری ذرائع کے مطابق سی ٹی ڈی کی جانب سے کی گئی کارروائی کے نتیجے میں کالعدم تحریک طالبان پاکستان بونیر کے کمانڈر کو گرفتار کر لیا گیا ہے، گرفتار ملزم رحمت علی شاہ والد عثمان غنی سے پستول بھی برآمد ہوا۔

انچارج سی ٹی ڈی چوہدری صفدر کا کہنا ہے کہ گرفتار ملزم خیبر پختونخوا حکومت کا اشتہاری ہے، ملزم کی گرفتاری پر خیبرپختونخوا کی جانب سے 20 لاکھ روپے انعام رکھا گیا تھا جبکہ، ملزم کی دہشت گردی کی کارروائی سے متعلق کے پی پولیس سے تصدیق بھی ہوئی ہے۔

سی ٹی ڈی کے مطابق ملزم نے خیبر پختونخوا کے علاقے بونیر میں 2009ء میں پولیس چوکی پر حملہ کیا تھا۔

سی ٹی ڈی کے مطابق دہشت گرد نے 2009 میں ایف سی کیمپ پر حملہ کیا تھا اور ایف سی کیمپ پر قبضہ کر کے اسلحہ وغیرہ لوٹ لیا تھا۔