شمالی وزیرستان: سیکیورٹی فورسز اور دہشت گردوں میں جھڑپ، 2 جوان شہید، 7 دہشت گرد ہلاک

اسلام آباد (ش ح ط) صوبہ خیبر پختونخوا کے قباائلی ضلع شمالی وزیرستان کے تحصیل دتہ خیل کے علاقہ سارہ وانہ میں سیکورٹی فورسز اور دہشتگردوں کے درمیان جھڑپ میں پاک فوج کے 2 جوان شہید ہوگئے، سیکورٹی فورسز کی جوابی کاروائی میں 7 دہشتگرد ہلاک ہوئے ہیں۔

آئی ایس پی آر کے مطابق سیکیورٹی فورسز نے دہشت گردوں کے خفیہ ٹھکانوں کی معلومات پر شمالی وزیرستان کے علاقے ذاکر خیل میں آپریشن کیا۔

آپریشن میں 7 دہشت گرد مارے گئے جب کہ فائرنگ کے تبادلے میں 2 سپاہی شہید ہو گئے۔ 23 سالہ شہید مومن شاہ کا تعلق خیبر پختونخوا کے ضلع ڈیرہ اسماعیل خان سے تھا اور 31 سالہ سپاہی محمد شاہ کا تعلق بھی خیبر پختونخوا کے ضلع ایبٹ آباد سے تھا۔ محمد شاہ نے پسماندگان میں بیوہ اور تین بچیاں چھوڑی ہیں۔

سیکورٹی فورسز کے جوانوں نے پورے علاقے کو گھیرے میں لیکر سرچ آپریشن شروع کردیا ہے۔