شمالی وزیرستان: شدت پسندوں نے گاڑی میں آگ لگا دی، 6 افراد جل کر ہلاک

میرانشاہ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان کے علاقے میر علی میں دہشت گردوں نے بھتہ نہ دینے پر ایک گاڑی پر فائرنگ کے بعد اسے آگ لگا دی، جس کے نتیجے میں گاڑی میں موجود 6 افراد جل کر ہلاک ہو گئے۔

سرکاری ذرائع کے مطابق کالعدم تحریک طالبان پاکستان کے شدت پسندوں نے گاڑی پر پیٹرول چھڑک کر اسے آگ لگا دی۔ واقعے کے بعد سیکیورٹی فورسز نے علاقے کو گھیرے میں لے کر خوارجیوں کی تلاش کے لیے سرچ آپریشن شروع کر دیا ہے۔

قبل ازیں میر علی پولیس کے ترجمان فضل سبحان نے بتایا کہ یہ واقعہ میر علی ایپی کے قریب پیش آیا، جہاں مسلح دہشت گردوں نے گاڑی کو روک کر فائرنگ کی اور بعدازاں آگ لگا دی۔ انہوں نے کہا کہ ہلاک ہونے والے افراد کی لاشیں شدید جھلس جانے کے باعث شناخت ممکن نہیں ہو سکی۔

فضل سبحان کے مطابق لاشوں کو قانونی کارروائی کے لیے فوری طور پر مقامی ہسپتال منتقل کر دیا گیا، جبکہ واقعے کے بعد علاقے میں خوف و ہراس پھیل گیا ہے۔