شمالی وزیرستان میں مچی خیل چیک پوسٹ پر خودکش حملہ، اہلکاروں سمیت 7 افراد زخمی

اسلام آباد (ش ح ط) صوبہ خیبر پختونخوا کے قبائلی ضلع شمالی وزیرستان میں اطلاعات کے مطابق ایک سکیورٹی چیک پوسٹ پر حملے میں سکیورٹی اہلکاروں سمیت 7 سے زائد افراد زخمی ہوگئے ہیں۔

https://twitter.com/ShabbirTuri/status/1746905754077180356?t=y2GX6hAkDw7Fnt7H861Gfg&s=19

شمالی وزیرستان سے ملنے والی اطلاعات کے مطابق یہ واقعہ بروز سوموار کو دوپہر پانچ بجے کے قریب میر علی میں مچی خیل چیک پوسٹ پر پیش آیا۔

عینی شاہدین کا کہنا ہے کہ ایک موٹر سائیکل پر سوار خودکش حملہ آور نے مچی چیک پوسٹ پر موجود سیکورٹی فورسز کے اہلکاروں پر دھماکہ حملہ کیا۔

بعض ذرائع کا کہنا ہے کہ گاڑی میں سوار مبینہ خودکش حملہ آوار نے بارود سے بھری گاڑی چیک پوسٹ سے ٹکرادی۔

عینی شاہدین نے کہا کہ حملے میں پرائیوٹ گاڑیوں بھی نقصان پہنچا ہے جو چیک پوسٹ قریب کھڑی تھی۔

سیکیورٹی ذرائع کے ایک اہلکار نے ڈیلی اردو کو بتایا کہ حملے میں متعدد سکیورٹی اہلکار زخمی ہوئے ہیں۔ انہوں نے مزید بتایا کہ زخمی اہلکاروں اور عام شہریوں کو میرانشا سکاؤٹس ہسپتال منتقل کیا گیا ہے۔

عینی شاہدین کا کہنا ہے کہ دھماکہ اتنا شدید تھا کہ اس کی آوازایں دور دور تک سنی گئیں۔

مقامی لوگوں کا کہنا ہے کہ اس واقعہ کے بعد سکیورٹی فورسز نے تمام راستوں کو بند کیا ہے کسی کو چیک پوسٹ کے قریب آنے جانے کی اجازت نہیں ہے۔

ڈسٹرکٹ پولیس آفیسر روخانزیب خان نے صحافیوں کو بتایا کہ خودکش حملے میں عصمت اللہ، شہزاد خان، سدا علی، دین محمد اور نعیم اللہ زخمی ہوئے ہیں جبکہ زخمیوں کو میران شاہ ہسپتال منتقل کر دیا گیا ہے۔

ڈی پی او کے مطابق حملے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

دوسری جانب حافظ گل بہادر گروپ کے جیش عمری بریگیڈ نے مچی خیل چیک پوسٹ پر خودکش حملے کی ذمہ داری قبول کر لی۔