شمالی وزیرستان میں کالعدم تحریک طالبان پاکستان کے دو دہشت گرد ہلاک

اسلام آباد (ش ح ط) ‏صوبہ خیبر پختونخوا کے قبائلی ضلع شمالی وزیرستان میں سی ٹی ڈی بنوں رینج، مقامی پولیس اور سیکورٹی فورسز کے مشترکہ آپریشن میں کالعدم تنظیم تحریک طالبان پاکستان (ٹی ٹی پی) کے دو دہشت گرد ہلاک ہوگئے۔

تفصیلات کے مطابق ‎سیکیورٹی فورسز نے انٹیلی جنس کی بنیاد پر شمالی وزیرستان کی تحصیل میر علی کے علاقے سپین وام میں آپریشن کیا ہے جس کے نتیجے میں دو دہشت گرد ہلاک ہوئے ہیں۔

قبائلی ضلع شمالی وزیرستان کے علاقے میرعلی میں سی ٹی ڈی اور سیکورٹی فورسز کا مشترکہ آپریشن، کالعدم تحریک طالبان پاکستان کے دو دہشت گرد لعل مرخان اور زرقیوم ہلاک، ہلاک دہشتگردوں کے قبضہ سے 2 ایس ایم جی، 1 ہینڈ گرنیڈز، 3 میگزین اور کارتوس برآمد#TTP #NorthWaziristan @Natsecjeff

— Shabbir Hussain Turi (@ShabbirTuri) October 29, 2021

سی ٹی ڈی بنوں ریجن کے مطابق آپریشن میں کالعدم تنظیم تحریک طالبان پاکستان کے علیم خان خوشالی گروپ کے دو دہشت گرد لعل مرخان اور زرقیوم ہلاک مارے گئے۔ ہلاک دہشت گردوں کے قبضہ سے دو عدد ایس ایم جی، ایک عد ہینڈ گرنیڈ، تین عدد میگزین اور کارتوس برآمد ہوئے۔

مارے گئے دہشت گرد ٹارگٹ کلنگ، اغوا برائے تاوان، بھتہ خوری، سیکیورٹی فورسز پر حملوں اور دھماکوں میں ملوث تھے۔

فورسز کی جانب سے علاقے کو گھیرے میں لے کر کلیئرنس سرچ آپریشن شروع کردیا گیا جو تاحال جاری ہے۔