غزہ: اسرائیلی فوج کی فائرنگ اور گولہ باری سے ایک فلسطینی شہید، 3 زخمی

خان یونس + غزہ (ڈیلی اردو) فلسطین کے علاقے غزہ کی پٹی میں آج اتوار کو علی الصباح اسرائیلی فوج نے اندھا دھند فائرنگ اور گولہ باری کے دوران ایک فلسطینی شہری کو شہید اور 3 کو زخمی کردیا۔

مرکز اطلاعات فلسطین کے مطابق اسرائیلی فوج نے جنوبی غزہ کے علاقے خان یونس میں عبسان کے مقام پر دو فلسطینیوں پرتوپ کے گولے داغے جس کے نتیجے میں ایک فلسطینی شہید اور دوسرا زخمی ہوگیا۔ ان کی مدد کو آنے والے تین دیگر فلسیطنیوں پر بھی فائرنگ کی گئی جس کے نتیجے میں وہ بھی زخمی ہوگئے۔

عبرانی ذرائع ابلاغ نے اسرائیلی فوج کی طرف سے بیان کردہ کہانی نشر کی ہے جس میں کہا گیا ہے کہ دو فلسطینی نوجوان غزہ کی سرحد کے قریب بم نصب کررہے تھے جب ان پر فائرنگ کی گئی۔

مرکزاطلاعات فلسطین کے نامہ نگار کےمطابق دو فلسطینی نوجوان اسرائیلی فوج کی فائرنگ سے شہید اور ایک زخمی ہونے والے نوجوان تک پہنچنے میں کامیاب ہوگئے۔ انہوں نے شہید اور زخمی کو اٹھا کر اسپتال پہنچا دیا۔

https://twitter.com/ShehabAgencyEn/status/1231519794194796546?s=19

فلسطینی وزارت صحت نے تین فلسطینیوں کے زخمی ہونے کی تصدیق کی ہے جنہیں علاج کے لیے غزہ میں یورپی اسپتال منتقل کردیا گیا ہے۔ اس واقعے کی ایک فوٹیج بھی وائرل ہوئی ہے جس میں صہیونیوں فوجیوں کو فلسطینی نوجوانوں پر وحشیانہ طریقے سے حملہ کرتے دیکھا جاسکتا ہے۔