غزہ پر مکمل قبضے کی تیاری! اسرائیل نے 60 ہزار ریزرو فوجی طلب کر لیے

یروشلم/غزہ (ڈیلی اردو/نیوز ایجنسیاں) اسرائیلی فوج نے اعلان کیا ہے کہ غزہ شہر کے تمام علاقوں پر قبضے کے منصوبے پر عملدرآمد کے لیے 60 ہزار ریزرو فوجی اہلکاروں کو طلب کیا جا رہا ہے۔ فوجی حکام کے مطابق یہ ریزرو اہلکار ستمبر میں اپنی ذمہ داریاں سنبھالیں گے تاہم فرنٹ لائن پر زیادہ تر موجودہ حاضر سروس اہلکار ہی تعینات ہوں گے۔

فوج کے مطابق یہ تیاری ’آپریشن گیڈونز رتھس کے اگلے مرحلے‘ کے لیے کی جا رہی ہے، جس کے دوران پانچ ڈویژن حصہ لیں گے۔ اس کے علاوہ 20 ہزار ریزرو فوجیوں کے آرڈرز میں توسیع بھی کر دی گئی ہے۔

عہدیداروں نے بتایا کہ وزیر دفاع اسرائیل کاٹز نے منگل کو اس منصوبے کی منظوری دی جسے اس ہفتے کے آخر میں سکیورٹی کابینہ میں پیش کیا جائے گا۔ زیتون اور جبالیہ سمیت کئی علاقوں میں فوجی کارروائیاں پہلے سے جاری ہیں۔

توقع ہے کہ اس منصوبے کے تحت لاکھوں فلسطینیوں کو غزہ شہر سے نکل کر جنوبی غزہ کی پناہ گاہوں میں منتقل ہونے کا حکم دیا جائے گا۔ اقوام متحدہ اور امدادی اداروں نے اس اقدام کو خطرناک قرار دیتے ہوئے خبردار کیا ہے کہ 22 ماہ کی جنگ کے بعد مزید بڑے پیمانے پر نقل مکانی وہاں رہنے والوں پر تباہ کن اثر ڈالے گی۔

دوسری جانب غزہ میں حماس کے زیر انتظام سول ڈیفنس ایجنسی کے ترجمان محمود باسل نے کہا کہ زیتون اور سبرا کے علاقوں میں صورتحال "انتہائی خطرناک اور ناقابلِ برداشت" ہے۔ ایجنسی کے مطابق بدھ کو اسرائیلی حملوں میں 21 فلسطینی ہلاک ہوئے، جبکہ وفا نیوز ایجنسی نے رپورٹ دی کہ شتی پناہ گزین کیمپ میں ایک ہی گھر پر بمباری سے تین بچے اور ان کے والدین ہلاک ہوگئے۔

واضح رہے کہ اسرائیل نے 7 اکتوبر 2023 کو حماس کے حملے کے بعد غزہ میں فوجی مہم شروع کی تھی جس میں اسرائیل میں 1200 افراد ہلاک جبکہ 251 کو یرغمال بنایا گیا تھا۔ غزہ کی وزارت صحت کے مطابق اب تک 62 ہزار سے زائد فلسطینی ہلاک ہو چکے ہیں۔