فرانس، جرمنی اور برطانیہ کا ایران کو "اسنیپ بیک" پابندیوں کا انتباہ

برلن (ڈیلی اردو/روئٹرز/اے ایف پی) فرانس، جرمنی اور برطانیہ نے ایران کو خبردار کیا ہے کہ اگر اس نے اگست 2025 کے آخر تک جوہری پروگرام پر سفارتی حل کے لیے پیش رفت نہ کی تو وہ 2015 کے جوہری معاہدے کے تحت ’’اسنیپ بیک‘‘ پابندیاں بحال کر سکتے ہیں۔

تینوں یورپی ممالک نے اقوام متحدہ کے سیکریٹری جنرل انٹونیو گوٹیرش اور سلامتی کونسل کو بھیجے گئے خط میں کہا ہے کہ وہ ایران کو جوہری ہتھیار بنانے سے روکنے کے لیے تمام سفارتی ذرائع استعمال کرنے کے لیے پرعزم ہیں۔

ایران کا مؤقف ہے کہ اس کا جوہری پروگرام صرف پرامن مقاصد کے لیے ہے اور وہ ہتھیار بنانے کا ارادہ نہیں رکھتا۔ یہ انتباہ ایسے وقت میں آیا ہے جب ایران نے اسرائیل کی جانب سے جون میں 12 روزہ جنگ کے آغاز کے بعد بین الاقوامی ایٹمی توانائی ایجنسی سے تعاون معطل کر دیا تھا۔ اس جنگ میں اسرائیل نے ایرانی فوجی رہنماؤں، سائنسدانوں اور جوہری تنصیبات کو نشانہ بنایا تھا، جبکہ بعد میں امریکہ نے بھی ایرانی جوہری تنصیبات پر حملے کیے۔

ای 3 کے وزرائے خارجہ نے خط میں کہا ہے کہ اگر ایران معاہدے کی شرائط پوری کرنے میں ناکام رہا تو سلامتی کونسل کی معطل شدہ پابندیاں بحال کی جا سکتی ہیں۔ یورپی ممالک کا دعویٰ ہے کہ ایران نے 2015 میں طے شدہ حد سے 40 گنا زیادہ یورینیم ذخیرہ کر رکھا ہے، تاہم اب تک اس کے ہتھیاروں کے معیار کے 90 فیصد تک افزودگی کے شواہد نہیں ملے۔

دریں اثناء، ایران نے دوبارہ آئی اے ای اے کے ساتھ بات چیت پر آمادگی ظاہر کی ہے اور جلد جوہری تنصیبات پر ادارے کے ایک وفد کی میزبانی کرے گا، جو جون کے تنازع کے بعد پہلا دورہ ہوگا۔