فرانس: جعلی دستاویزات اور منی لانڈرنگ کا الزام، 11 پاکستانی گرفتار

پیرس (ڈیلی اردو) فرانسیسی پولیس کی جانب سے پیرس کے مضافاتی علاقے میں گرفتار کیے گئے گیارہ افراد کا تعلق پاکستان سے بتایا گیا ہے۔ ان تمام افراد کے خلاف جعلی دستاویزات بنانے اور ان کے استعمال سے جعلی کمپنیاں قائم کرنے کے علاوہ تارکین وطن کو غیر قانونی طریقے سے ملازمت دینے، منی لانڈرنگ اور بینک فراڈ جیسے الزامات عائد کیے گئے ہیں۔

فرانسیسی اخبار کے مطابق ان پر فرانس میں کام کے لیے آنے والے غیر قانونی تارکین وطن کی مدد، دھوکا دہی اور منی لانڈرنگ کا بھی شبہ ہے۔ ملزمان کی عمریں 30 سے 40 برس کے درمیان ہیں جن پر فرد جرم عائد کردی گئی ہے۔ اس نیٹ ورک کے ارکان پر الزام ہے کہ انہوں نے تعمیراتی جگہوں پر غیر قانونی مزدوروں کی خدمات حاصل کیں۔ ملزمان نے تین برس میں 41 ملین یورو کی منی لانڈرنگ بھی کی۔

پولیس کے مطابق ان افراد کے خلاف تفتیش 2020 سے شروع ہوئی تھی اور ایک سال سے زاید عرصے کی تفتیش کے بعد گرفتاریاں عمل میں لائی گئی ہیں۔ ان تمام افراد کے خلاف جعلی دستاویزات بنانا، جعلی دستاویزات پر جعلی کمپنیاں بنانا، دھوکہ دہی، منی لانڈرنگ اور بینک فراڈ جسے الزامات عائد کرنے کے بعد ان تمام افراد کو جیل بھیج دیا گیا ہے۔

پولیس کی ابتدائی رپورٹ میں بتایا گیا ہے کہ ان افراد نے جعلی دستاویزات کےذ ریعے 180 بینک اکاونٹ کھولے۔